Bankasýslan á, fyrir hönd íslenska ríkisins, að gera kröfu um að stjórn Íslandsbanka víki. Ný stjórn á síðan að ráða nýjan bankastjóra sem starfar í hennar umboði. Að því búnu á að leggja Bankasýsluna niður.

Þetta er álit tveggja þingmanna Vinstri grænna, og sennilega fleiri. Í það minnsta telur Steinunn Þóra Árnadóttir að svo sé en hún birti í gær færslu á Facebook þar sem inntakið er það sem hér er nefnt að ofan. Þeirri færslu deildi annar þingmaður Vinstri grænna, Orri Páll Jóhannsson, með orðunum „Steinunn Þóra súmmerar þetta vel!“

Í færslunni sagði Steinunn Þóra að skýrsla fjármálaeftirlitsins, og vísaði þar til sáttar stofnunarinnar við Íslandsbanka vegna misferla við sölu hlutar ríkisins í bankanum, væri mikill áfellisdómur yfir starfsmönnum Íslandsbanka sem sáu um framkvæmdina á sölunni. Það hafi því vakið furðu Steinunnar Þóru að Jón Gunnar Jónsson, forstjóri Bankasýslunnar, skyldi enn halda sig fast við þá skoðun að um hafi verið að ræða „farsælasta hlutabréfaútboð í Íslandssögunni“. Augljóslega gæti það ekki verið í ljósi þess að lög voru brotin.

„Ég myndi ekki vilja vera sá bankastjóri“

Steinunn Þóra segir enn fremur að skiljanlegt sé að Birna Einarsdóttir hafi þegar vikið úr starfi sem bankastjóri, en ljóst sé af lestri skýrslunnar að hún beri ekki ein ábyrgð. „Fyrir liggur að hluthafafundur verður haldinn í bankanum síðar í sumar. Það liggur að sjálfsögðu beinast við að Bankasýslan sem á þeim fundi fer með umboð ríkisins geri kröfu um afsögn stjórnar og að nýr bankastjóri í bankanum sé ráðinn í umboði nýrrar stjórnar.“

Spurð hvort hún sé með þessu að krefjast þess að Jóni Guðna Ómarssyni, sem ráðinn var bankastjóri Íslandsbanka í stað Birnu aðfararnótt miðvikudags, verði sagt upp störfum af nýrri stjórn og annar ráðinn í hans stað segir Steinunn Þóra svo ekki vera. „Í rauninni ekki heldur finnst mér skipta máli að bankastjóri sé ráðinn í umboði nýrrar stjórnar.“

Og það gæti í praxís verið Jón Guðni Ómarsson, ef að ný stjórn myndi svo vilja?

„Ég er ekki að útiloka það.“

Þá með einhverjum endurskoðunum á starfskjörum jafnvel?

„Ný stjórn myndi fara í það.“

Þú ert sem sagt að segja að ótækt sé að bankastjóri hafi ekki umboð frá nýrri stjórn?

„Ég myndi ekki vilja vera sá bankastjóri alla vega.“

Spurð hvort hún sé með þessum málflutningi vera að tala fyrir hönd annarra þingmanna Vinstri grænna, auk Orra, svarar Steinunn Þóra: „Þetta eru mín orð en ég held að þetta sé nú meira og minna í takti við sýn annarra, án þess að ég hafi borið það undir þau. Þetta eru mín orð, sem Orri tekur undir, en hafa ekki verið borin undir þingflokkinn.“

Klára þarf niðurlagningu Bankasýslunnar

Steinunn Þóra sagði enn fremur í færslunni að fara þyrfti í þá vinnu, sem formenn ríkisstjórnarflokkanna hafa þegar boðað, „um að leggja Bankasýsluna niður og breyta fyrirkomulaginu kringum utanumhald á sölu hlutum ríkisins í fjármálafyrirtækjum.“

Þá ítrekar Steinunn Þóra málflutning Vinstri grænna þess efnis að ekki skuli seldir frekari hlutir ríkisins í Íslandsbanka á „meðan rannsókn þessara mála stendur yfir og fyrirkomulagið endurskoðað.“