Ljóshærðar konur í sundfötum eða hermannabúningum lofa Donald Trump Bandaríkjaforseta og lasta andstæðinga hans – en þessir áhrifavaldar eru skapaðir með gervigreind og flæða yfir samfélagsmiðla með eldheitum pólitískum skilaboðum fyrir þingkosningarnar í Bandaríkjunum.

Uppgangur ofurraunverulegra gervimenna – sem herma eftir pólitískum slagorðum Trumps á borð við „Ameríka fyrst“ og enduróma málflutning hans í málum eins og innflytjendamálum – undirstrikar notkun nýrrar tækni í viðleitni til að virkja íhaldssaman kjósendahóp hans sem kenndur er við MAGA, Make America Great Again.

„Hvar eru allir MAGA-vinir mínir? Ef þú kaust Trump, segðu það þá hátt og skýrt í athugasemdunum og þú færð nýjan fylgjanda frá Texas,“ segir heillandi ung kona á TikTok með rauða MAGA-derhúfu. Hún er ekki til.

„Trump er framtíð Ameríku,“ stendur í texta yfir öðru TikTok-myndbandi sem búið er til með gervigreind og sýnir unglingsstúlku á strönd með bandaríska fánann blaktandi í bakgrunni.

Í Instagram-myndbandi við lagið „YMCA“ með Village People segir gervigella, sem lýst er sem „MAGA-föðurlandsvini“, að hún hafi „komið út úr skápnum sem Trump-stuðningsmaður“.

Ekki er ljóst hverjir standa á bak við gervigreindaraðgangana og hvort þeir séu hluti af skipulagðri áhrifaaðgerð fyrir kosningarnar í nóvember sem munu ráða því hvort repúblikanar haldi yfirráðum sínum á þinginu.

Fyrr á þessu ári birti Trump sjálfur á samfélagsmiðlinum sínum Truth Social myndband af platínuljóshærðri gervigreindargellu– með því glæsilega útliti sem er vinsælt meðal aðdáenda hans – sem bar fram tilefnislausar ásakanir um spillingu á hendur Gavin Newsom, ríkisstjóra Kaliforníu úr röðum demókrata.

Móta almenningsálitið

Síðustu mánuði hafa bandarískir fjölmiðlar greint hundruð gervigreindarbúinna áhrifavalda sem styðja Trump – unga menn og konur í hermannabúningum eða klædda sem innflytjendafulltrúar – sem tjá sig um viðkvæm pólitísk mál, þar á meðal þungunarrof og deilurnar við Íran.

Rannsóknarstofan Governance and Responsible AI Lab (GRAIL) við Purdue-háskóla hefur einnig fylgst með fjölmörgum slíkum aðgöngum á TikTok, Instagram og Facebook.

„Vaxandi bylgja pólitískra gervigreindaráhrifavalda í aðdraganda kosninganna 2026 gefur innsýn í framtíð þar sem hægt er að nota ofurmarkvisst gervigreindarefni til að móta almenningsálitið,“ sagði Andrew Yoon hjá CivAI, sjálfseignarstofnun sem einbeitir sér að möguleikum og hættum gervigreindar, í samtali við fréttastofuna AFP.