Donald Trump, forseti Bandaríkjanna, sagði í dag að hann væri að íhuga árásir á landi gegn venesúelskum eiturlyfjahringjum. Þetta kemur í kjölfar nokkurra mannskæðra loftárása á báta sem sagðir voru flytja eiturlyf, án þess þó að sannanir þess efnis hafi birst.

„Við erum vissulega að horfa til lands núna, því við höfum náð mjög góðum yfirráðum á hafi úti,“ sagði Trump við fréttamenn í forsetaskrifstofunni þegar hann var spurður hvort hann væri að íhuga árásir á landi.

Trump neitaði hins vegar að staðfesta frétt New York Times um að hann hefði leynilega heimilað CIA að framkvæma leynilegar aðgerðir í Venesúela gegn stjórn Nicolas Maduro forseta.

Þegar hann var spurður hvort hann hefði veitt CIA heimild til að „taka út“ Maduro, eða að ráða hann af dögum, svaraði Trump: „Það er fáránleg spurning að leggja fyrir mig. Ekki beint fáránleg spurning, en væri það ekki fáránlegt af mér að svara henni?“

Trump, sem hefur lýst sér sem friðarsinna, hefur víkkað út skilgreiningu á erlendum hermönnum þannig að þær nái yfir grunaða fíkniefnasmyglara. Sömuleiðis hefur hann talað fyrir því að andfasistar í Bandaríkjunum, undir merkjum slagorðsins Antifa, séu hryðjuverkamenn og boðað að þeir verði upprættir, sem og verði stuðningsmenn þeirra leitaðir uppi.

Heræfingar í Venesúela

Venesúela tekur hótununum, bæði opinberum og leynilegum, alvarlega.

Í gær voru haldnar heræfingar undir stjórn Maduro meðfram allri Atlantshafs- og Karíbahafsströnd Venesúela og aðrar hernaðaraðgerðir eru fyrirhugaðar í héruðum við landamærin að Kólumbíu.

Í skilaboðum á samfélagsmiðlinum Telegram sagði Maduro að hann væri að virkja herinn, lögregluna og þjóðvarðlið til að verja „fjöll, strendur, skóla, sjúkrahús, verksmiðjur og markaði“ Venesúela.

Trump sagði á þriðjudag að í annarri árás á báta sem sagðir voru flytja fíkniefni frá Venesúela hefðu sex „eiturlyfjahryðjuverkamenn“ fallið.

Að minnsta kosti 27 manns hafa fallið í árásum Bandaríkjanna hingað til. Sérfræðingar efast um lögmæti þess að aflífa grunaða án dóms og laga á erlendu eða alþjóðlegu hafsvæði, án þess að stöðva eða yfirheyra viðkomandi.

Gustavo Petro, forseti Kólumbíu, hefur sagt að hann telji að sumir þeirra sem létust hafi verið kólumbískir.

Trump sakar Maduro um að stýra eiturlyfjahring – ásakanir sem Maduro neitar.

Áður en hernaðaraðgerðir voru hertar tvöfaldaði dómsmálaráðuneyti Bandaríkjanna í ágúst verðlaunafé til höfuðs Maduro í 50 milljónir dala fyrir upplýsingar sem gætu leitt til handtöku hans.

Niculas MaduroTalinn einræðisherra af flestum vestrænum ríkjum, er hinn 62 ára gamli forseti Venesúela fyrrverandi verkalýðsleiðtogi. Fjölmiðlafrelsi hefur hrunið í landinu frá því Maduro tók við völdum 2013 af forvera sínum, Hugo Chávez.

Fordæmir valdaránstilraun CIA

Forseti Venesúela, Niculas Maduro, fordæmdi á miðvikudag það sem hann kallaði „valdarán skipulögð af CIA“.

„Nei við stríði í Karíbahafi ... Nei við stjórnarskiptum ... Nei við valdaránum skipulögðum af CIA,“ sagði vinstrisinnaði og einræðissinnaði leiðtoginn í ávarpi til nefndar sem var sett á fót eftir að bandarísk yfirvöld sendu herskip til Karíbahafsins í yfirlýstum aðgerðum gegn eiturlyfjum.

Maduro er víða sakaður um að hafa haldið völdum með kosningasvindli í fyrra, en eins og þekkt er hafa milljónir flúið Venesúela undan efnahagskreppu og einræðisstjórn landsins, þar á meðal þúsundir til Íslands.