Hælisleitendur fá ekki jólauppbót í ár eins og áður hefur tíðkast. Þetta kemur fram í tilkynningu sem Útlendingastofnun sendi Reykjanesbæ, Hafnarfjarðarbæ og Reykjavíkurborg í lok nóvember. 

Fréttin hefur verið uppfærð, sjá neðst í greininni.

RÚV fjallaði um málið á dögunum og greindi frá því að Útlendingastofnun hefði haft samráð við dómsmálaráðuneytið um að svipta hælisleitendur desemberuppbótinni, en ákvörðunin er tekin á grundvelli nýlegrar reglugerðar Sigríðar Andersen dómsmálaráðherra um útlendinga. 

„Það er alfarið ákvörðun ríkisins að fella niður umrædda uppbót handa hælisleitendum“

„Það er alfarið ákvörðun ríkisins að fella niður umrædda uppbót handa hælisleitendum,“ segir Elfa Björk Ellertsdóttir, upplýsingafulltrúi Reykjavíkurborgar á sviði velferðarmála og umhverfismála, í svari við fyrirspurn Stundarinnar. 

Kristín Völundardóttirforstjóri Útlendingastofnunar

Mynd: Skjáskot

Í bréfi Útlendingastofnunar til sveitarfélaganna kemur fram að samkvæmt 30. gr. umræddrar reglugerðar sé Útlendingastofnun heimilt að setja almennar reglur um aukna þjónustu við umsækjendur að fengnu samþykki ráðherra. „Slíkar reglur hafa ekki verið settar og að mati stofnunarinnar er ekki tilefni til þess að svo stöddu,“ segir í bréfinu sem er undirritað af Kristínu Völundardóttur, forstjóra Útlendingastofnunar. 

„Útlendingastofnun mun því ekki greiða umsækjendum um alþjóðlega vernd aukinn fjárhagsstuðning um komandi jól og veðrur hann því með sama hætti og aðra mánuði ársins. Með hliðsjón af því markmiði reglugerðarinnar að samræma þjónustu og kveða skýrt á um rétt umsækjenda upplýsir Útlendingastofnun samningsaðila sína um framangreinda ákvörðun.“ 

Stundin hefur áður fjallað um reglugerð Sigríðar Andersen sem felur meðal annars í sér að útlendingar eru sviptir réttinum til framfærslufjár eftir að hælisumsóknum þeirra er synjað og meðan þeir bíða eftir að vera sendir úr landi. Ef hælisleitandi er frá ríki sem er á lista yfir örugg upprunaríki og umsókn er metin „bersýnilega tilhæfulaus“ getur Útlendingastofnun jafnframt fellt niður alla þjónustu við viðkomandi eftir að framkvæmdarhæf ákvörðun um synjun umsóknar liggur fyrir. Rauði krossinn gagnrýndi reglugerðina og benti á að vegna hennar gætu hælisleitendur lent milli steins og sleggju, án atvinnuréttinda og framfærslufjár, jafnvel vikum saman meðan þeir biðu eftir að vera sendir úr landi. 

Undir lok síðasta þings beittu þingmenn Sjálfstæðisflokksins, með Sigríði Andersen í fararbroddi, sér af mikilli hörku gegn réttarbótum fyrir barnafjölskyldur sem höfðu sótt um hæli á Íslandi. Aðrir flokkar á Alþingi sameinuðust um lagabreytingarnar, en Sjálfstæðisflokkurinn greiddi atkvæði á móti þeim. Skömmu áður hafði Bjarni Benediktsson, þá forsætisráðherra, talað opinskátt um að hann sæi eftir þeirri ákvörðun að veita albanskri fjölskyldu með langveikan dreng íslenskan ríkisborgararétt.

Þrátt fyrir að Sjálfstæðisflokkurinn hafi sýnt meiri hörku í útlendingamálum en aðrir flokkar fer flokkurinn, og Sigríður Á. Andersen, áfram með málefni hælisleitenda og flóttamanna í ríkisstjórn Katrínar Jakobsdóttur. 

Uppfært kl. 22:40:

Ríkisstjórnin mun nota ráðstöfunarfé sitt til að greiða hælisleitendum jólauppbót ef tillaga dómsmálaráðherra, sem hún ætlar að leggja til á ríkisstjórnarfundi á morgun, gengur eftir. „Ég hef lagt til, í samráði við forsætisráðherra, og mun leggja það til á ríkisstjórnarfundi á morgun, að ríkisstjórnin ráðstafi af því fé sem hún hefur til umráða fjárhæð sem kemur til móts við hælisleitendur þessa vikuna,“ sagði hún í viðtali við RÚV í kvöld.