„Það var ekki hægt að flýja frá þessu“
Linda ólst upp á heimili með dæmdum barnaníðingi og konu sem var síðar dæmd fyrir misþyrmingar gagnvart börnunum. Frá því að alsystir hennar leitaði til lögreglu leið eitt og hálft ár þar til Linda komst í fóstur. Á þeim tíma versnuðu aðstæður á heimilinu. Enn lengri tími leið þar til yngri systkini þeirra voru fjarlægð þaðan.
Vanræksla á skyldum kostaði mannslíf
Eftirlifendur snjóflóðsins á Súðavík sem kostaði 14 manneskjur lífið árið 1995 opnuðu sig í áhrifamiklu viðtali við Heimildina um lífsreynsluna og kölluðu eftir endurskoðun á harmleiknum sem þau telja hafa verið fyrirbyggjanlegan. Umfjöllunin leiddi til endurupptöku rannsóknar á málinu í október þegar að eftirlifendur fengu áheyrn 28 árum síðar.
„Ég er mjög prívat persóna“
Egill Helgason segist í upphafi hafa skolfið eins og lauf í vindi þegar hann var í sjónvarpi en elski nú að vera í beinni. Hann sagði skilið við Silfrið á árinu og í viðtali við Heimildina rifjaði hann upp eftirminnileg atvik frá ferlinum. Egill ræddi einnig opinskátt um glímu sína við kvíða og þunglyndi.
Paradís varð að martröð
Foreldrar níu ára gamallar stúlku með fötlun sögðu frá hryllilegri lífsreynslu vegna kynferðisafbrots starfsmanns sumarbúðanna í Reykjadal á dóttur þeirra og spillingu lögreglurannsóknar um málið af hálfu starfsmanna búðanna.
Leigufélagið Alma stórhækkaði leigu flóttafólks
Leiguhækkanir leigufélagsins Ölmu í janúar, um allt að 114%, komu illa við 16 fjölskyldur úkraínska flóttafólksins í Urriðaholti sem ræddi við Heimildina um erfiðan flótta sinn frá heimalandinu og öryggið sem það fann á Íslandi. Endurnýjað rótleysi vegna óyfirstíganlegra leiguhækkana olli fjölskyldunum miklum áhyggjum.
„Mér leið skringilega en ég hugsaði bara, ókei“
Katla Sif Ægisdóttir hlaut gullverðlaun í 50 metra skriðsundi á Special Olympics í sumar. Katla Sif, sem er 23 ára, býr hjá foreldrum sínum en stefnir á að fara í sjálfstæða búsetu með vinkonu sinni fljótlega. Henni finnst „dálítið hræðilegt“ að fóstrum sé eytt ef líkur eru taldar á Downs- heilkenni hjá barninu og hefur hún upplifað fordóma á eigin skinni.
Valdatafl um stöðu útvarpsstjóra kostaði Auðun geðheilsuna
Auðun Georg Ólafsson sagði frá erfiðri lífsreynslu sinni þegar að honum bárust hótanir valdamikilla manna í kjölfar þess að hann sagði upp starfi sínu sem útvarpsstjóri á fyrsta degi. Mótmæli, hótanir og streita kostuðu Auðun geðheilsuna um tíma, en hann segir lífsreynsluna hafa tekið mörg ár að komast yfir.
SJÁ EINNIG
Veiktist alvarlega í kjölfar hótana, smánunar og útskúfunar
Draumurinn um heimili rættist eftir langa glímu við úrræðaleysi yfirvalda
Viðtal Heimildarinnar við Axel Ayari og syni hans tvo, vakti mikla athygli á árinu. Feðgarnir höfðu þá búið í hjólhýsi í fimm mánuði eftir algert úrræðaleysi sem þeir mættu hjá félagsmálayfirvöldum. Draumur drengjanna um heimili rættist svo stuttu síðar í kjölfar umfjöllunarinnar.
Kenndi börnum stærðfræði en hreinsar nú hótelherbergi þar sem launin rétt svo duga
Stærðfræðikennari frá Úkraínu, Yuliia Yedynak, var við störf sem hótelþerna Íslandshótela og var í hringamiðju verkfalla Eflingar á árinu. Yuliia lýsti því hvernig laun hennar rétt svo nægðu fyrir leigu og mat þrátt fyrir að vinna 160 klukkutíma á mánuði.
„Þetta er uppspuni, lygi. Þetta er byggt á hatri, engu öðru“
Veiga Grétarsdóttir opnaði sig um niðurlægjandi upplifun sína í sundferð sinni í Grafarvogslaug. Orðrómar höfðu farið sem eldur í sinu um fjölmiðla þar sem staðhæft var að transkona með typpi hefði berað sig fyrir framan börn í sundlaug Grafarvogs. Veiga steig fram til þess að leiðrétta þær rangfærslur og sagði frá því sem raunverulega gerðist.
„Á maður að halda áfram eða á maður að gera eitthvað annað?“
Gyrðir Elíasson opnaði sig um einsemdina sem hefur verið honum drifkraftur í listsköpuninni í 40 ár en hann segir að jafnvægið milli hennar og algerrar einangrunar sé vandmeðfarið. Sjálfur glími hann við krónískt þunglyndi sem sjá megi sem vissan þráð gegnum öll hans verk.
„Ég var ekki orðin fertug en mér leið eins og gamalli konu“
Meðvirkni og sálræn áföll aðstandenda alkóhólista eru ekki síður skemmandi en fíknisjúkdómurinn sjálfur, en heilar fjölskyldur verða fyrir djúpstæðum áhrifum eins og Helga Óskarsdóttir sagði frá í opinskáu viðtali.
Kristján er „alltaf einmana“
Einmanaleika hefur verið lýst sem faraldri víða um heim og í Bretlandi hefur hann náð slíkum tökum á samfélaginu að skipaður hefur verið sérstakur ráðherra einmanaleika. Hugtakið einmana dauði hefur verið notað til að lýsa andlátum fólks sem deyr eitt án þess að nokkur verði þess var svo dögum eða vikum skiptir. Í Hátúni 10 lýsa íbúar hvernig þeir takast á við einmanaleikann og fagfólk á ýmsum sviðum segir frá því því hvernig er að koma að einmana dauða í störfum sínum.
„Ég grét og spurði af hverju hún hefði gert þetta, af hverju hún vildi deyja frá okkur“
Emma Lind Þórsdóttir var sjö ára þegar sjúkrabíll var kallaður að heimilinu og móðir hennar var flutt á geðdeild. Seinna heyrði hún sannleikann um sjálfskaða móður sinnar. Móðir hennar hefur náð bata, en Emma Lind glímir við afleiðingar fátæktar og öryggisleysis, tvítug stelpa sem er staðráðin í að skapa sér betra líf.
Ísland var mjög framandi fyrir Sayed: „Hvaða land er þetta? Get ég farið þangað?“
Merkileg lífssaga Sayed Khanogli var til umræðu í samtali við Heimildina í sumar. Sayed hefur verið á flótta meirihluta ævinnar en yfirgaf heimaland sitt í Afganistan þegar hann var 14 ára. Eftir fjögurra ára veru á Íslandi talar hann íslensku, útskrifaðist úr Borgarholtsskóla í kvikmyndagerð og dreymir um að gera heimildarmynd um reynslu flóttafólks af því að skapa sér nýtt líf.
„Ég lifi í hreinni martröð“
Palestínska stúlkan Asil Al Masri varð fyrir því hryllilega áfalli að missa nær alla fjölskyldu sína í loftárásum Ísraelshers á Gasa. Asil og bróðir hennar Suleiman, sem búsettur er á Íslandi, töluðu við Heimildina. Suleiman óskaði þess heitast að fá systur sína til Íslands til sín og varð sú ósk að veruleika þegar að Alþingi veitti Asil ríkisborgararétt 16. desember, en hún er væntanleg til landsins eftir áramót.
„Þetta var alveg vont og það var sjokk að sjá typpið í fyrsta sinn“
Hafliði Pétursson var 16 ára þegar hann fór að velta því fyrir sér hvort hægt væri að laga forhúðina hans. Hún var þröng og olli honum óþægindum í kynlífi og þegar hann pissaði. Hann hafði aldrei heyrt talað um aðgerðir á forhúð en opnaði fartölvuna sína og sló upp á Google: „Þröng forhúð“ og komst að því að hann væri ekki eini maðurinn í heiminum í þessum vandræðum.
„Ég vissi alveg að ég væri ólétt en hafði ekki hugrekki til að takast á við það“
Jódís Skúladóttir alþingiskona ólst upp með ógæfufólki, missti systur úr alkóhólisma og horfði upp á hnignun föðurins. Hún grét í koddann og missti röddina, hafði ekki hugrekki til að viðurkenna að hún sem var sjálf bara barn var með barni.
„Reyndar er ég bara meira glaður“
Jóhannes Hrefnuson Karlsson sagði frá lífsgleðinni eftir erfið veikindi. Hann fékk streptókokkasýkingu í heila og var í dái í níu daga og glímir við málstol eftir veikindin. Jóhannes er blöðrulistamaður með meiru og einstaklega jákvæður og bjartsýnn þegar hann horfir til framtíðarinnar.
„Ég átti vini sem voru drepnir fyrir skóna sem þeir voru í“
Þrátt fyrir að móðir Oriönu Dasiru Agudelo Pinedu og systir hennar hafi fengið hæli hér á landi fljótlega eftir að þær sóttu um það verður Oriana send aftur til Venesúela í byrjun nóvember, jafnvel þó að Útlendingastofnun telji að hún eigi á hættu að sæta þar illri meðferð. Ástæðan fyrir því að hún fékk ekki vernd er sú að hún er með tvöfaldan ríkisborgararétt – venesúelskan og kólumbískan.
Uppgjör ársins 2023
2023: Ár nýrra ógna og möguleika
Eru Rússar að vinna stríðið?
Hvað gerðist raunverulega í Ísrael og á Gasasvæðinu fyrir stríðið?
Athugasemdir