Sigrún Davíðsdóttir setti á fót Saunasetrið á Hvammstanga síðastliðið haust. Þar fara fram svokallaðir gusutímar þar sem fólk er inni í talsverðum hita á milli þess sem það stígur út fyrir og kælir sig. Viðtökurnar við setrinu eru mjög góðar og er heimafólk ánægt með framtakið, enda eru ávinningar af þessari iðju margvíslegir.
Sigrún segir að hugmyndin hafi fæðst fyrir rúmu ári síðan, en dóttir hennar er gusumeistari í Reykjavík og hafði Sigrún sótt tíma til hennar sem hafi kveikt áhuga hennar á að opna setur á Hvammstanga. „Ég var tiltölulega nýflutt hingað og fannst vanta eitthvað svipað hér eins og er víða fyrir sunnan. Ég hef líka alltaf verið mikil sánukona, ég stundaði svokallað sweat fyrir einhverjum árum líka og það varð úr að við opnuðum í október í fyrra. Ég var svo heppin að fá fallegasta staðinn hér í bænum, niðri í fjöru, við hliðina á Selasetrinu og svo er veitingastaðurinn Sjávarborg hérna líka. Hér er frábært útsýni og það hafa verið svakalega góðar móttökur hér hjá okkur.“
Býður ferðamenn velkomna
Að sögn Sigrúnar byrjaði hún að sjá um þetta ein og var með umrædda gusutíma þrisvar í viku á ákveðnum dögum á ákveðnum tímum. Síðar tók hún svo inn starfsmann á móti sér sem er einnig með tíma. „Þessir tímar eru í eina klukkustund í senn, fólk kemur í sundfötum, slopp og inniskóm. Það er ekki sturtuaðstaða hér, en ég er með box fyrir föt og snaga fyrir sloppa. Þetta eru þrjár lotur í fimmtán mínútur í senn, fólk er fyrst í hita og fer svo út að kæla sig í nokkrar mínútur. Sumir fara í sjóinn og aðrir standa bara úti í og kæla sig í vindinum. Þannig fólk fer inn og út til skiptis.
„Ég er mjög þakklát fyrir að hafa opnað þetta hér, ég sé áhugann og það hefur myndast skemmtilegt sánusamfélag
Fólk hefur verið að koma héðan og þaðan að, en ég er líka með einkatíma og tek á móti hópum. Ég var til dæmis með tíu konur frá Landspítalanum í Reykjavík á dögunum. Svo erum við að fara af stað með auglýsingaherferð fyrir erlenda ferðamenn, þar sem þeir fara að koma meira hingað á næstunni. Okkur langar auðvitað að bjóða þau velkomin til okkar líka.“
Fór blint af stað
Sigrún segist hafa farið alveg blint af stað með þetta á Hvammstanga, en segir að viðtökurnar hafi verið frábærar. Það er ekki önnur slík starfsemi á Norðurlandinu fyrir utan Akureyri að sögn Sigrúnar, en hún segir að hægt sé að finna gusutíma á Akranesi, í Stykkishólmi, Borgarnesi og svo séu margir staðir í Reykjavík líka. „Við komum til með að vera með viðburði í sumar af og til, til dæmis sem tengjast bæjarhátíðinni hér í bæ sem verður í júlí. Svo stefnum við á að fá inn nýjan gusumeistara á næstunni, þannig að það er nóg fram undan,“ segir Sigrún full af eldmóði.
Að sögn Sigrúnar stundar fólk á öllum aldri gusurnar og segir hún að yngsti gesturinn hafi verið 15 ára, en að þau taki ekki á móti yngri börnum en það. „Svo er þetta alveg upp úr, alveg allur aldur. Fólk er að koma úr sveitinni og úr næstu nágrannasveitarfélögum en stærsti kúnnahópurinn er fólk sem býr hér á Hvammstanga. Ég hlakka til að fá fleiri hópa, þetta er svo mikil samvera og félagsskapur, það er mikil nánd og það myndast góð orka, sem gerir mikið fyrir fólk.“
Þakklát fyrir að hafa látið vaða
Sigrún segir að ávinningur af gusunni sé margvíslegur, bæði fyrir líkama og sál. „Þegar fólk fer inn í svona hita og kælir sig á móti, þá svitnar það og það verður mikil hreinsun á húðinni. Hjartað pumpar í hitanum og hægir svo á sér í kuldanum. Þetta er svolítið eins og að vera í líkamsrækt, það er mikil brennsla í gangi og svo er þetta streitulosandi, fólk segist finna mikinn mun á sér, til dæmis varðandi kvíða. Það slakar á og þetta bætir svefn líka, maður sefur eins og engill eftir svona tíma. Svo þegar fólk kemur oftar þá fer fólk að finna langvarandi ávinning. En maður finnur samt alveg breytingu strax, þetta er mjög gott fyrir ofnæmiskerfið og bara allt kerfið í raun. Ég er mjög þakklát fyrir að hafa opnað þetta hér, ég sé áhugann og það hefur myndast skemmtilegt sánusamfélag. Við erum með klippikort og fólk kemur aftur og aftur og kemur með vini og ættingja með sér og hópurinn stækkar sífellt.“
Athugasemdir