Maðurinn er eina dýrategund jarðarinnar sem er upptekin af hefndinni. Íslendingasögur ganga meira eða minna út á hefndaraðgerðir með hrikalegum afleiðingum. Í Laxdælu drepur Bolli Þorleiksson, Kjartan Ólafsson náfrænda sinn og vin, til að hefna fyrir einhverja óvirðingu. Kjartan hafði áður hefnt sín á Bolla vegna þess að hann stal frá honum kærustunni, Guðrúnu Ósvífursdóttur. Bræður Kjartans drápu Bolla frænda í hefndarskyni. Guðrún, eiginkona Bolla, var ólétt þegar maður hennar var drepinn. Nokkru síðar eignaðist hún son sem alinn var upp með eitt markmið fyrir augum, að hefna föður síns. Hann gerði það aðeins 12 ára gamall og drap Helga nokkurn Harðbeinsson banamann Bolla. Öll bókin er lofsöngur til hefndarinnar. 

Fyrri heimsstyrjöldin var sett af stað til að hefna fyrir morðið á fremur lítilsigldum aðalsmanni. Þjóðverjar fóru út í þá seinni að sögn til að hefna fyrir yfirgang Pólverja á landamærunum. Íraksstríðið var hefndaraðgerð fyrir árásina á tvíburaturnana 11/9. Reyndar komu Írakar hvergi nærri þeim atburði en einhvers staðar varð hefndin að bera niður. 

Hefndin er sæt og lögmæt ástæða til að drepa fólk.  

Fyrir skemmstu skutu hryðjuverkamenn liðlega hundrað manns í París í hefndarskyni fyrir loftárásir Frakka á bækistöðvar íslamskra vígamanna. Frakkar svara með enn ógeðslegri hefndaraðgerðum og sprengja nú sem aldrei fyrr óbreytta borgara í Sýrlandi. 

Halldór Laxness lýsir í Gerplu aðförum víkinga í ránsferðum sínum til Englands og víðar. Þeir reyndu að drepa 40 óbreytta borgara fyrir hvern vopnfæran karlmann sem snerist til varnar gegn þeim. Víkingar höfðu sérlega gaman af því að drepa börn með því að þræða þau uppá spjótsodda. Þeir trúðu því að glórulaust ofbeldi hefði mikinn fælingarmátt. Halldór segir að allir ofbeldisherir hafi þetta að leiðarljósi, 40 óbreyttir á móti einum hermanni og þræða börn upp á spjótsodda. 

Börn eru þrædd upp á sprengjuoddana eins og á tímum víkinganna.

Menningarþjóðin Frakkar trúir á þessa grundvallarreglu. Þeir senda hverja flugvélina á fætur annarri til að sprengja í tætlur híbýli fólks, verksmiðjur og skrifstofur undir því yfirskini að um sé að ræða bækistöðvar íslamska ríkisins. Stundum láta þeir í veðri vaka að byggingarnar séu vel upplýstar með neonskiltum sem á standi ISIS og Frakkar geti kastað spengjum sínum með góðri samvisku. Sannleikurinn er allt annar. Flestar sprengurnar falla meðal óbreyttra borgara svo að Fransmenn ná auðveldlega markmiðum víkinganna í Gerplu að drepa 40 manns fyrir hvern einn vígamann. Börn eru þrædd upp á sprengjuoddana eins og á tímum víkinganna. Sannleikurinn liggur í valnum eins og venjulega og pólitíkusar ljúga útum bæði munnvikin. Voðaverkin hafa nefnilega fælingarmátt. 

Þetta er gert í nafni franskrar menningar og kristinnar trúar og vesturlönd fagna með hinum hefnigjörnu Fransmönnum. Langflestir Facebook-notendur skreyta forsíðumynd sína frönskum fána til að leggja áherslu á stuðning sinn við þessi glórulausu mannvíg. Þessar aðgerðir eru sambærilegar við það að Bretar hefðu ákveðið að sprengja Belfast í loft upp til að ráða niðurlögum írska lýðveldishersins. Hætt er við að þá hefði sungið í tálknunum útum allan heim en flestum er sama um almenning í Sýrlandi enda eru þetta múslímar og viðurkennd fól.

Vígamenn íslamska ríkisins eiga eftir að hefna fyrir þessar árásir og Frakkar þurfa að hefna fyrir hefndaraðgerðirnar og þannig koll af kolli næstu árin. Heimurinn lærir aldrei að hefndin er skelfilega heimskuleg eins og þeir Bolli og Kjartan í Laxdælu fengu að kynnast af eigin raun. Sprengjubrjálæði Frakka í Sýrlandi og morð þeirra á óbreyttum borgurum er sambærilegt við glæpaverk þeirra í Alsír. 

Fyrir langa löngu hætti ég að drekka frönsk rauðvín til að mótmæla kjarnorkuvopnatilraunum þeirra á Múruroaeyjum. Enn meiri ástæða er núna til að beina viðskiptum sínum í aðrar áttir. 

Feitlaginn, morðóður og kvensamur forseti Frakka sker upp herör gegn óbreyttum borgurum í Sýrlandi. Allir sjá að hann er að staðfesta kyngetu sína með öllum þessum eldflaugum og reðurtáknum sem hann sendir ofan í kokið á Sýrlendingum. Þessar árásir hleypa lífi í lim forsetans fjölþreifna. Það væri ódýrara og betra fyrir heimsbyggðina að gefa honum heldur Viagra til að narta í á síðkvöldum.