Breytingarnar sem ríkisstjórnin leggur til á tekjuskattskerfinu þýða að skattar hjá þorra fólks sem tilheyrir efri millitekjuhópum og hátekjuhópum munu lækka um sömu fjárhæð og skattar hjá þorra lágtekjufólks.

Bjarni Benediktsson fjármálaráðherra kynnti tillögurnar á blaðamannafundi í fjármálaráðuneytinu í dag og fullyrti að ef breytingarnar yrðu að veruleika myndi skattbyrði lágtekjufólks lækka um rúm tvö prósentustig. Þetta er einnig staðhæft á vef fjármálaráðuneytisins. Samkvæmt talnaefni sem varpað var upp á blaðamannafundinum er hins vegar ljóst að stór hluti lágtekjufólks mun ekki fá svo mikla lækkun á skattbyrði sinni.

Mynd: Fjármálaráðuneytið

Ríkisstjórnin leggur til að bætt verði við nýju skattþrepi með lægra skatthlutfalli neðarlega í tekjustiganum. Skattbyrði tekjulægstu Íslendinga verði alls lækkuð um rúm 2 prósentustig eða sem nemur 6760 krónum á mánuði. Þá verði viðmiði um þróun persónuafsláttar breytt til að stöðva skattskrið og samnýting þrepa afnumin.

Fyrirhuguð skattalækkun mun ná hátt upp tekjustigann. Svo virðist sem ekki standi vilji til þess að hrófla við skattlagningu hæstu tekna. „Það er ekki verið að auka skattbyrðina neins staðar. Þetta finnst mér afskaplega mikilvægt,“ sagði Bjarni Benediktsson á blaðamannafundinum. Þannig er áfram gert ráð fyrir að skatthlutfall efsta þrepsins verði um 46,24 prósent, lægra en gengur og gerist á hinum Norðurlöndunum.

Í kynningarefni á vef fjármálaráðuneytisins eru áhrif fyrirhugaðra skattalækkana sýnd. Veruleg skattalækkun kemur í hlut fólks sem er vel yfir meðaltekjum, t.d. til barnafjölskyldna þar sem foreldrar hafa hátt í tvær milljónir í mánaðartekjur:

Mynd: Fjármálaráðuneytið

„Stjórnvöld hafa stefnt að því að minnka álögur og líta til jafnaðar. Starfshópur hefur unnið tillögur að breytingum eftir þessum leiðarstefjum. Niðurstaðan af vinnu hópsins er að æskilegt sé að jöfnunin grundvallist meira á þrepum kerfisins en persónuafslætti/skattleysismörkum,“ segir í tilkynningu á vef fjármálaráðuneytisins. „Því er mælt með nýju þrepi sem lækkar skatthlutfall sérstaklega fyrir þá sem eru í lægstu tekjutíundunum. Fyrir þá sem eru með mánaðalaun upp á 325 þúsund krónur þýðir þetta aukningu ráðstöfunartekna um 81 þúsund krónur.“

Sólveig Anna Jónsdóttir, formaður Eflingar, tjáir sig um tillögurnar í tilkynningu á vef  stéttarfélagsins. „Ég skil ekki hvers vegna þau smyrja þessari örlitlu lækkun svona langa leið upp launastigann,“ segir hún. „Hvers vegna þau eyða þessu pínulitla svigrúmi, eins og þau kalla það, á laun sem duga vel fyrir framfærslu, þannig að lækkunin sem hver fær dugar engan veginn fyrir þann stóra fjölda sem er á lægstu launum?“ 

Halldór Benjamín Þorbergsson, framkvæmdastjóri Samtaka atvinnulífsins, hefur fagnað tillögunum en fulltrúar launþegahreyfingarinnar tekið þeim fálega. „Við höfðum búist við einhverju í nánd við 20 þúsund á mánuði“ segir Sólveig Anna. „Það hefði getað verið grundvöllur fyrir alvarlegu samtali.“ Fullyrt er á vef Eflingar að hugmyndir ríkisstjórnarinnar snúist um skattalækkun um 6.760 krónur á mánuði fyrir mánaðarlaun upp að 900.000 krónum. Aðgerðirnar kæmu ekki til framkvæmda fyrr en á næsta ári.

Fram kom í kynningu Bjarna Benediktssonar að samkvæmt hinu nýja kerfi yrði skatthlutfall fyrsta þreps 32,94 prósent. Persónuafsláttur yrði 56.477 krónur á mánuði og þar með skattleysismörk 159.174 krónur á mánuði. 

Drífa Snædal

Mynd: Heiða Helgadóttir

Drífa Snædal, forseti ASÍ, tjáir sig um málið á Facebook og skrifar:

Dagur vonbrigða í dag þegar við fengum kynningu á skattatillögum stjórnvalda. 

1. Skattalækkun upp allan stigann (enginn að kalla eftir skattalækkun á hæstu tekjuhópana). 

2. Sennilega frysting persónuafsláttar í nokkur ár (raunlækkun persónuafsláttar). 

3. Ekkert meira inn í barnabóta- og húsnæðiskerfin en komið er (Fjármagn í barnabætur hafa ekki náð raungildi ársins 2010). 

4. Enginn hátekjuskattur eða hækkun á auðlindagjöldum og fjármagnstekjuskatti (Tekjuöflun engin). 

5. Skattalækkun á þá hópa sem enn ná ekki endum saman dugar varla fyrir einni ferð í Bónus og sú lækkun á að koma einhverntíman á næstu þremur árum.

Niðurstaða: Þetta verður ekki til að liðka fyrir kjarasamningum.