Upphæð vaxtabóta í ár verður sú lægsta síðan vaxtabótakerfið var sett á fót. Samkvæmt nýrri fjármálaáætlun ríkisstjórnarinnar munu reiknireglur vaxtabóta verða þær sömu fram til ársins 2023 og viðmiðunarfjárhæðir vaxtabóta standa í stað að raungildi næstu árin. Endurskoðun stefnu um bótakerfi, tekjuskatt og húsnæðisstuðning frestaðist vegna stjórnarskipta og því óljóst hvaða upphæðir verða settar í málaflokkinn til lengri tíma.

Fjárhagslegur stuðningur við leigjendur hækkaði um áramótin en vaxtabætur halda áfram að dragast saman. Fjárheimildir vegna þeirra lækkuðu úr 4,3 milljörðum króna í 4 milljarða á milli ára á fjárlögum, en þær hafa aldrei verið lægri að raunvirði. Eru þær nú tæpur þriðjungur þess fjármagns sem ríkið leggur í húsnæðisstuðning. Húsnæðisbætur til leigjenda eru nú hærri en vaxtabætur til eigenda húsnæðis.

„Það vekur athygli hversu stór hluti vaxtabóta rennur til fólks í efri tekjuhópum,“ segir Ólafur Heiðar Helgason, hagfræðingur í hagdeild Íbúðalánasjóðs. „Þá renna vaxtabætur eðli málsins samkvæmt aðallega til fólks …