Pedro Sánchez, forsætisráðherra Spánar, svaraði í morgun gagnrýni og hótunum Donalds Trumps, forseta Bandaríkjanna, vegna þeirrar ákvörðunar Spánverja að leyfa ekki bandarískum flugvélum að nota herstöðvar sínar til árása á Íran.

„Afstöðu spænsku ríkisstjórnarinnar má draga saman í þremur orðum: Nei við stríði,“ sagði hann í sjónvarpsávarpi, degi eftir að Trump hótaði að slíta öllum viðskiptum við Spán.

„Við munum ekki verða samsek í einhverju sem er skaðlegt fyrir heiminn og gengur gegn gildum okkar og hagsmunum, einfaldlega af ótta við hefndaraðgerðir,“ sagði Sánchez.

„Spánn hefur verið hræðilegur,“ sagði Trump við fréttamenn þegar hann hitti Friedrich Merz, kanslara Þýskalands, í Hvíta húsinu í gær.

„Við ætlum að slíta öllum viðskiptum við Spán. Við viljum ekkert með Spán hafa.“

Ríkisstjórn Spánar hefur staðið fast við þá afstöðu að fylgja beri alþjóðalögum og stofnsáttmála Sameinuðu þjóðanna. Brotið hefur verið gegn þeim síðustu ár í hótunum Bandaríkjanna gegn Grænlandi, aðgerðum gegn Venesúela, árásum á Gaza og innrásinni í Úkraínu.

„Sumir munu segja að við séum ein í þessari von, en það er heldur ekki satt. Ríkisstjórn Spánar stendur með þeim sem hún á að standa með, hún stendur með þeim gildum sem foreldrar okkar og afar og ömmur festu í stjórnarskrá okkar. Spánn stendur með grundvallarreglum Evrópusambandsins, hann stendur með stofnsáttmála Sameinuðu þjóðanna,“ sagði Sánchez í morgun.

Forsætisráðherrann nefndi Trump ekki á nafn í ávarpi sínu og minntist ekki á notkun spænsku herstöðvanna í Rota og Morón, sem var kveikjan að hótun Bandaríkjaforseta. Ræða hans var hins vegar full af óbeinum tilvísunum og vörn fyrir fullveldi og stöðu Spánar gagnvart hótunum frá Trump.

„Það er algjörlega óásættanlegt að þeir leiðtogar sem eru ófærir um að sinna því verkefni – að bæta líf fólks – noti þoku stríðsins til að hylma yfir eigin mistök og fylla um leið vasa fárra, þeirra sömu og alltaf,“ sagði hann.