Segir að Bandaríkin muni taka olíu Írans

Donald Trump, for­seti Banda­ríkj­anna, hót­aði því í dag að gera nýjar árásir á Íran og bætti við að banda­rískar her­sveitir myndu brátt leggja undir sig helstu olíu­inn­viði lands­ins.

Banda­ríkja­her mun gera „MJÖG HARÐA ÁRÁS Á ÍRAN Í KVÖLD,“ sagði Trump í færslu á Truth Social.

„Einhvern tíma í ekki svo fjar­lægri fram­tíð munum við taka yfir Kharg-eyju og aðra olíu­inn­viði og ná fullri stjórn á olíu- og gasmörk­uðum þeirra, líkt og við höfum gert með Venes­ú­ela,“ bætti hann við.

Trump hefur ekki tek­ist að ljúka stríðs­á­tökum við Íran, sem hófust með árás Banda­ríkj­anna og Ísraels á landið 28. febr­úar síð­ast­lið­inn.

Afleiddar afleið­ingar stríðs­ins eru verð­hækk­anir á olíu, áburði og fleiru. Í dag hækk­aði Evrópski Seðla­bank­inn stýri­vexti sína í fyrsta sinn síðan 2023, vegna verð­bólgu sem hlýst af stríð­inu.

Heild­sölu­verð í Banda­ríkj­unum hækk­aði mikið í maí og mæld­ist hæsta 12 mán­aða hækkun í meira en þrjú ár. Ástæðan er hækk­andi orku­verð vegna stríðs­ins gegn Íran sem hefur áhrif á stærsta hag­kerfi heims.

Vísitala fram­leiðslu­verðs (PPI) hækk­aði um 6,5 pró­sent á 12 mán­aða tíma­bili sem lauk í maí, að því er Hagstofa Banda­ríkj­anna (BLS) greindi frá í dag. Þetta er mesta hækkun síðan í nóv­em­ber 2022.

Milli mán­aða hækk­aði verð um 1,1 pró­sent, sem var meira en mark­aðs­að­ilar höfðu spáð.

Stærsta hag­kerfi heims hefur glímt við þrá­láta verð­bólgu frá Covid-19-far­aldr­inum og hafa ein­kenn­andi tollar Donalds Trumps Banda­ríkja­for­seta og stríð Banda­ríkj­anna og Ísraels gegn Íran aukið þrýst­ing á verð­lag.

Íslend­ingar fara ekki var­hluta af hækk­unum, en tíma­bundin lækkun á virð­is­auka­skatti elds­neytis hefur dempað áhrifin. Engu að síður spáir Lands­bank­inn því að vísi­tala neyslu­verðs hækki um 0,81% í júní og verði verð­bólga 5,1%, sem leiðir til þess að for­sendur kjara­samn­inga bresta í ágúst.