Donald Trump, forseti Bandaríkjanna, sagði í dag að Íran hefði verið of lengi að semja um lausn á deilunni í Mið-Austurlöndum og yrði nú „að borga fyrir það“.

Færsla Trumps á samfélagsmiðlum, þar sem hann fullyrti að íranski herinn hefði verið „gjörsigraður“, kom í kjölfar þess að Bandaríkin og Íran skiptust á skotum og reyndu þannig á vopnahlé sem tók gildi í apríl.

„Eineltisseggurinn í Mið-Austurlöndum er DAUÐUR!!! Þeir voru of lengi að semja um samkomulag sem hefði verið frábært fyrir þá, nú verða þeir að gjalda fyrir það!!!“ skrifaði Trump á samfélagsmiðilinn sinn, Truth Social.

Þetta stangaðist á við ummæli hans til fréttamanna í gær um að samningaviðræður um varanlega lausn til að binda enda á stríðið væru á „lokametrunum“ og gætu klárast á „tveimur eða þremur dögum“.

Seint í gærkvöldi sagðist bandaríski herinn hafa gert árásir á Íran í hefndarskyni fyrir að bandarísk þyrla var skotin niður á mánudag, en íranskir fjölmiðlar greindu frá sprengingum meðfram suðurströnd landsins.

Bandaríski herinn sagði síðar að flugherinn og sjóherinn hefðu stjórn á svæðinu.

Íranar sögðust hafa gert árásir á bandarískar herstöðvar í Jórdaníu og Barein í dag.