Tillagan markast af því að við viljum tryggja sjúkraflug áfram og áætlunarflug – og láta það hafa allan forgang á Reykjavíkurflugvelli. En einkaþotum hefur fjölgað gríðarlega og þyrluferðum. Það er óþarfi að hafa það inni í miðborg Reykjavíkur. Þetta snýst um að lágmarka umferðina á flugvellinum við það sem snýr að almannahagsmunum.“

Þetta segir Þórdís Lóa Þórhallsdóttir, borgarfulltrúi Viðreisnar. Í vikunni fékkst tillaga hennar, sem snýr meðal annars að því að einkaþotum og þyrluflugi verði fundinn annar staður en á Reykjavíkurflugvelli, samþykkt í borgarstjórn.

Almannahagsmunir yfir sérhagsmuni

„Það sem okkur gengur til er að draga fram hvað það skiptir miklu máli að tryggja almannahagsmuni fyrir alla þjóðina en finna sérhagsmununum þarna annan stað,“ segir Þórdís Lóa. Hún bendir á að einka- og þyrluflug hafi aukist mikið á síðastliðnum árum en slíkt flug þurfi ekki að vera í miðborginni þar sem fjölmargir íbúar verði fyrir hávaðamengun og verri loftgæðum. 

Tillaga Þórdísar Lóu er tvíþætt. Annars vegar snýr hún að því að borgarstjóri beiti sér fyrir því að einkaþotur og þyrluflug hverfi úr Vatnsmýrinni. Hins vegar að því að staðið verði við samkomulag frá 2013 sem undirritað var af þáverandi borgarstjóra og innanríkisráðherra. En samkomulagið kveður meðal annars á um að einka- og kennsluflug hverfi frá flugvellinum. „Þetta er ellefu ára gamalt samkomulag sem hefur ekki verið fylgt eftir að fullu og það þarf að klára það.“

„Alveg til í að syngja oftar“

Nokkra athygli vakti þegar borgarfulltrúinn tók upp á því á borgarstjórnarfundinum að syngja Láttu þér líða vel með Stjórninni í pontu. Þórdís Lóa segir að Heiða Björg Hilmisdóttir borgarstjóri hafi farið yfir það í ræðu um málið að ein fjölmargra úttekta um flugvöllinn hefði verið frá 1991. „Ég fór að hugsa. Vá, hvað það er langt síðan. Hvað var eiginlega vinsælt þá? Svo ég gúglaði það. Þá kom þetta lag upp.“

Þórdís Lóa segist þá einnig hafa farið að hugsa um Skúla Helgason, borgarfulltrúa Samfylkingarinnar, sem sé að verða sextugur á næstunni. „Af því að Stjórnin var náttúrlega vinsæl þegar hann var ungur maður. Svo ég ákvað að syngja fyrir hann lag sem ég kunni ekki einu sinni.“ Hún segist þó ekki hafa leitt hugann að því að það gæti endað á netinu. 

Heldurðu að söngurinn hafi hjálpað við að fá tillöguna samþykkta?

„Ég held að þau láti ekki eitthvert gaul í mér hafa áhrif á sig,“ segir Þórdís Lóa. „Ég held bara að það hafi verið margir sammála því að við þyrftum að vera með skýra línu í þessu. En ef það er þá er ég alveg til í að syngja oftar,“ segir hún létt í bragði.