Lög­manns­stofan Wikborg Rein, fyrir hönd Samherja, bauð lista­manninnum Oddi Eysteini Frið­riks­syni, Odee, sátt í mála­ferlum sjáv­ar­út­vegs­fyr­ir­tæk­is­ins á hendur honum, um leið og ljóst var að Odee hafði fengið lög­menn til að verja hags­muni sína úti í Bret­landi. Vildi Samherji fella málið niður gegn því að Odee eft­ir­léti fyr­ir­tæk­inu lénið sam­herji.co.uk. Odee hefur hins vegar engin áform um að þiggja þá sátt. „Ég trúi á mál­frelsið og tján­ing­ar­frelsið og á ekki von á öðru en að ég vinni þetta mál.“

Svo sem Heim­ildin hefur ítrekað greint frá setti Odee í loftið vef­síðu sem hluta af list­gjörn­ingi sínum, „We‘re Sorry“, þar sem hann birti yfir­lýs­ingu þess efnis að Samherji bæð­ist afsök­unar á fram­ferði sínu í Namibíu og héti því að vinna með yfir­völdum, namibískum sem íslenskum, auk ann­arra aðila og væri reiðu­búið til að bæta fyrir gjörðir sínar.

Létu blekkjast af fréttatilkynningunni

Samherji fór fram á það fyrir dóm­stóli í Bret­landi að sett yrði á bráða­birgða lög­bann á umrædda heima­síðu og á það féllst dóm­ari í mál­inu.   Byggði mál­flutn­ingur Samherja á því að til­gangur síð­unnar, útlit hennar og nafn, hefði verið til að blekkja net­not­endur, og lögðu lög­menn fyr­ir­tæk­is­ins áherslu á að þeim blekk­ingum hefði verið beint að breskum neyt­endum og hugs­an­legum við­skipta­vinum eða sam­starfs­að­ilum fyr­ir­tæk­is­ins þar í landi. Var bent á að minnsta kosti einn fjöl­mið­ill, írska frétta­síðan The Fishing Daily, hefði látið blekkj­ast og birt frétt upp úr frétta­til­kynn­ing­unni. Lögmenn Samherja bentu á þetta sem dæmi um skaða sem frétta­til­kynn­ingin og vef­síðan hefðu valdið. Umrædd frétt var þó tekin niður af vef­síðu The Fishing Daily.

Óttast frekari skaða á orðspori

Í fram­burði lög­manns Samherja, Cristophers James Grieveson, varð honum tíð­rætt um umrædda frétta­til­kynn­ingu. Sagð Grieveson hana inni­halda „játn­ingar, afsök­un­ar­beiðnir og lof­orð sem kær­andi [Samherji] hefur ein­fald­lega ekki sett fram.“

Þá hefði Odee með gjörn­ingnum villt um fyrir aðilum í sjáv­ar­út­vegi og almenn­ingi sem myndu aug­ljós­lega tengja efni vef­síð­unnar við Samherja og þar með „bera annan hug til kær­anda. Hann hefur skaðað, og gæti skaðað, við­skipta­vild kær­anda og tök fyr­ir­tæk­is­ins á að reka starf­semi sína með þeim lög­mæta hætti sem kær­andi leit­ast við.“

Segjast ekki vera að reyna að hefta málfrelsi

Þá vakti lög­maður Samherja sér­staka athygli dóm­ara á Odee hefði einnig notað vöru­merki Samherja, nafn fyr­ir­tæk­is­ins, í stóra vegg­mynd í Lista­safni Reykja­víkur, sem hefði vakið athygli íslenskra fjöl­miðla og valdið því að fleiri net­not­endur hefðu farið um vef­síð­una. Þó til­greinir Grieveson lög­maður fyrir dómnum að Samherji hygg­ist ekki leita til dóm­stóla vegna vegg­mynd­ar­innar í Lista­safn­inu, ekki að svo komnu máli. Ástæðan sé að um sé að ræða tíma­bundið verk á útskrift­ar­sýn­ingu, og „þó það [fyr­ir­tækið Samherji] gagn­rýni verkið, er það ekki að reyna að hefta mál­frelsi.“

Fer ófögrum orðum um Samherja og Wikborg Rein

Sem fyrr segir buðu lög­menn Samherja sátt í mál­inu strax og lög­menn þeir sem Odee hafði fengið til starfa settu sig í sam­band við Wikborg Rein. „Fyrstu við­brögð hjá þeim voru að Samherji væri til­bú­inn að semja við mig. Þeir vildu í raun bara fella málið niður og fá lénið í sínar hendur,“ segir Odee í sam­tali við Heim­ild­ina.

Odee segir hins vegar að hann hafi hafnað öllum sátta­um­leit­unum og detti ekki í hug að semja við Samherja um eitt né neitt. „Mín afstaða er að þeir megi fokka sér, þessi norska lög­fræði­stofa má fokka sér, Samherji má fokka sér. Ég ætla ekki að semja um nokkurn skap­aðan hlut. Þeir hafa kom­ist upp með að semja sig út úr öllum and­skot­anum og í kjöl­farið hafa þeir getað sagt að þeir séu sak­lausir af hinu og þessu sem þeir hafa gert. Með fram­komu sinni gagn­vart mér sýna þeir bara sitt rétta and­lit.“

Málið mun því ganga sinn gang fyrir dóm­stólum úti í Bret­landi.

Samherji nú með tölvupóstsamskipti fjölda fólks undir höndum

Í úrskurði dóm­ara varð­andi lög­banns­skröf­una sagði að Odee væri skylt að færa lén vef­síð­unnar yfir til Samherja, auk þess að taka niður síð­una, og að tryggja að hún, auk allra net­fanga sem henni teng­ist, verði gerð óvirk þar til dóm­stóll­inn birtir loka­úr­skurð í mál­inu. Samherja er hins vegar óheim­ilt að nota lénið á nokkurn hátt fyrr en að feng­inni heim­ild dóm­ara. Sömu­leiðis var til­greint að Samherja væri skylt að hlíta hverri þeirri nið­ur­stöðu dóms­ins sem lyti að því að greiða þyrfti Odee bætur vegna lög­banns­ins, ef það til þess kæmi.

Samkvæmt úrskurði dóm­stóls­ins er Odee óheim­ilt að skrá, afla sér eða nota nokkuð lén þar sem orðið sam­herji kemur fyrir, sem og nokk­urt orð sem er því líkt. Þá er honum óheim­ilt að nota orðið Samherji í titli vef­síðu eða í nokkru útgefnu efni. Sömu sögu er að segja um notkun á vöru­merkjum eða útgefnu efni Samherja.

Dómarinn féllst hins vegar ekki á þá rök­semd lög­manna Samherja að Odee hefði notað vöru­merkin í við­skipta­legu sam­hengi og byggði ákvörðun sína um lög­bannið ekki á því, heldur að um óheim­ila notkun á vöru­merkjum væri að ræða.

Odee var þá jafn­framt gert skylt að afhenda Samherja öll tölvu­póst­sam­skipti þar sem not­ast var við sam­herji.co.uk net­föng. Um er að ræða vel á þriðja hund­rað tölvu­pósta, flestir þeirra eru póstar sem Oddur sjálfur sendi en þó ein­hverjir tugir þar sem um er að ræða tölvu­pósta frá nafn­greindu fólki, blaða­mönnum og öðrum, með per­sónu­legum upp­lýs­ingum þeirra. Þá hefur Samherji nú undir höndum.