Samherji hefur aldrei greitt Swapo-flokknum neina fjár­muni, segir Björgólfur Jóhanns­son, for­stjóri fyr­ir­tæk­is­ins, í svari við fyr­ir­spurn Stund­ar­innar.

The Namibian greindi frá því í dag að blaðið hefði heim­ildir fyrir því að Swapo flokk­ur­inn, sem hefur verið ráð­andi í stjórn­málum Namibíu um ára­tuga skeið, hafi fengið greiðslur frá útgerð­ar­fé­lag­inu Samherja. „Millj­ónir voru greiddar inn á reikn­ings sem Swapo stjórnar,“ að því er fram kemur í blað­inu. Munu þær hafa átt sér stað árið 2017, skömmu fyrir lands­þing flokks­ins, og farið fram í gegnum lög­manns­stofu.

„Samherji hefur aldrei greitt Swapo-flokknum neina fjár­muni, hvorki beint né í gegnum milli­lið,“ segir Björgólfur í svari við fyr­ir­spurn Stund­ar­innar. „Þessi frétt The Namibian er því röng. Við væntum þess að rang­færsl­urnar verði ekki end­ur­fluttar.“

Eins og Stundin, Kveikur, Al Jazeera og Wikileaks greindu frá í fyrra sýna gögn hvernig Sam­herji greiddi skipu­lega hund­ruð millj­óna króna í mút­ur til stjórn­mála­manna og tengdra að­ila í Namib­íu, til að fá hesta­makríl­kvóta sem lagði grunn að stór­um hluta af hagn­aði fé­lags­ins und­an­far­in ár. Hagn­að­ur­inn og mútu­greiðsl­urn­ar runnu í gegn­um net skatta­skjóla.

Björgólfur tók við af Þor­steini Má Bald­vins­syni, sem steig til hliðar sem for­stjóri eftir að upp­lýst var um málið í nóv­em­ber í fyrra. Þor­steinn Már snéri aftur í mars og hafa þeir starfað saman síðan.