Bjarni Benediktsson, formaður Sjálfstæðisflokksins, fór í frí til Austurríkis tveimur vikum eftir að hann tók við embætti forsætisráðherra. Hann hélt utan þann 27. janúar og er væntanlegur til landsins í dag.
Stundin hefur gert ítrekaðar tilraunir til að fá staðfest frá forsætisráðuneytinu hvort Bjarni sé erlendis í einkaerindum eða embættiserindum. Engin svör fást, hvorki símleiðis né í tölvupósti.
Samkvæmt heimildum Stundarinnar er Bjarni í skíðaferð. Fyrir vikið hefur hann ekki getað tekið þátt í umræðum á Alþingi um embættisskyldur sínar og ábyrgð á töfum á birtingu skýrslunnar um niðurfærslu verðtryggðra fasteignalána. Fram kom í fréttum síðustu helgi að lokadrög að skýrslunni hefðu verið tilbúin í júní 2016 og vinnslu hennar verið endanlega lokið fyrir þingkosningar. Þetta er önnur af tveimur skýrslum sem Bjarni ákvað að sitja á fram yfir kosningarnar, en hin skýrslan fjallaði um umfang aflandseigna Íslendinga og það hvernig ríkisstjórnir Sjálfstæðisflokksins létu undir höfuð leggjast að sporna gegn aflandsvæðingu á útrásarárunum.
Sem fyrr segir tók Bjarni sér frí á föstudaginn í síðustu viku, þann 27. janúar, en þá voru aðeins þrír dagar frá því að Alþingi kom aftur saman eftir langt jólafrí sem stóð frá 22. desember.
Bjarni var gagnrýndur harðlega í umræðum á Alþingi um tafir á birtingu skýrslnanna á þriðjudag. Þá var gerð athugasemd við að hann væri ekki á staðnum. „Ég verð að nota tækifærið og kvarta yfir því að hæstvirtur forsætisráðherra sé ekki á staðnum og verði ekki hér í þessari viku, þar sem það væri mjög gott að geta fengið að spyrja hæstvirtan forsætisráðherra um nákvæmlega þetta mál,“ sagði Ásta Guðrún Helgadóttir, þingkona Pírata.
Athygli vakti þegar Bjarni, þá fjármálaráðherra, tók sér frí í byrjun janúar 2015 þegar verkfall lækna og kjaradeilur þeirra við ríkið stóðu sem hæst. Þá tók hann sér einnig frí í apríl sama ár, um það leyti sem verkfall hundruða starfsmanna á Landspítalanum skall á. Loks var hann í fríi í Flórída þegar Kastljós sýndi margboðaðan þátt um Panamaskjölin og tengsl ráðamanna við skattaskjól í apríl síðastliðnum.
ACD-ríkisstjórnin
„Fáránleika-raunsæi eða raunsæislegur fáránleiki“
Ráðherra braut lög þegar hann setti rektor án auglýsingar
Unnu náið með hæstaréttardómurunum meðan þeir dæmdu Arnfríðarmál
Þorsteinn: Jafnvel enn alvarlegra en málið sem varð síðustu ríkisstjórn að falli
Frumgjöld verða 35 milljörðum hærri á næsta ári heldur en fyrri ríkisstjórn stefndi að
Athugasemdir