Albanska fjölskyldan sem flutt var úr landi í morgun er lent í Berlín í Þýskalandi þar sem þýskir lögreglumenn tóku á móti þeim. Flugvél Icelandair lenti í höfuðborg Þýskalands klukkan 12.10, með fjölskylduna innanborðs, 26 ára gamla ólétta konu sem komin er tæpar 36 vikur á leið, unnusta hennar og tveggja ára gamlan dreng. Íslenskir lögreglumenn fylgdu fjölskyldunni um borð í vélina á Leifstöð á undan öðrum farþegum, samkvæmt frásögn sjónvarvotts sem flaug með sömu vél. Þá fylgdu þeir þeim til móts við þýska lögreglumenn sem tóku á móti þeim.
„Ég tékkaði mig bara inn eins og venjulegur maður og þegar kom að því að fara inn í vélina þá sá ég að það var einhver seinkun. Allt í einu birtast lögreglumenn með tvo fullorðna einstaklinga og eitt barn á milli sín og fara fram fyrir röðina og beint inn í vél. Ég pældi einhvernveginn ekkert í þessu og vissi í rauninni ekkert hvað væri að gerast, en tók náttúrulega eftir þessu eins og aðrir,“ segir farþeginn sem vill ekki láta nafn síns getið.
Það hafi svo ekki verið fyrr en hann kíkti á netið í símanum sínum, þegar hann var búin að koma sér fyrir, sem hann hafi raunverulega áttað sig á því sem væri í gangi. „Þá sá ég að það hafði verið brottvísun í nótt. Ég sat þarna með íslenska vatnið mitt og vegabréfið og gubbaði eiginlega bara upp í mig,“ segir maðurinn sem bætir við að allt hafi verið með kyrrum kjörum.
„Ég hef ekki orðið vitni af mörgum brottvísunum en þetta virkaði þannig á mig að allt væri mjög yfrvegað, það var ekkert drama eða neitt, fólk er væntanlega bara búið að gefast upp þegar svona er komið,“ segir farþegi Icelandair sem varð síðar vitni að því þegar þýskir lögreglumenn tóku á móti fjölskyldunni í Berlín, eins og sjá má á meðfylgjandi mynd.
Samkvæmt frásögn No Borders samtakanna birtist lögreglan óvænt og án fyrirvara til að handtaka og brottvísa fólkinu klukkan 18 í gærkvöldi. Konan hafi orðið fyrir „miklu stressi og byrjaði að blæða mikið úr nefi“. Parið hafi fengið heimild lögreglu til að fara á spítala, með þeim fyrirvara að lögregla myndi sækja fjölskylduna klukkan fimm í nótt fyrir brottvísunarflugið. Fram kemur í frásögn No Borders að konan hafi fengið vottorð á spítalanum um að henni væri ekki ráðlagt að fljúga vegna ástands síns.
Stundin hefur vottorðið undir höndum. Í því kemur fram: „Það vottast hér með að _____________ er ófrísk og gengin skv. síðustu tíðum 35 vikur og 5 daga. Hún er slæm af stoðkerfisverkjum í baki og ætti erfitt með langt flug.“
Undir vottorðið skrifar læknir á kvennadeild Landspítalans.
Flóttamenn
Hvað gerðist raunverulega í Ceuta?
ESB fundar með talibönum um endursendingu hælisleitenda
Verður brottvísað í næstu viku
Fá ekki að læra hér frekar en í Afganistan
Segir nýju útlendingalögin notuð í „skipulagða herferð“
Athugasemdir