Um 26 ára gömul kona, sem komin er tæplega 9 mánuði á leið, hefur verið tekin af lögreglu í nótt í því skyni að flytja hana úr landi, samkvæmt tilkynningu frá samtökunum No Borders.
Samkvæmt frásögn samtakanna birtist lögreglan „óvænt og án fyrirvara til að handtaka og brottvísa þeim“ klukkan 18 í gærkvöldi. Konan hafi orðið fyrir „miklu stressi og byrjaði að blæða mikið úr nefi“. Parið hafi fengið heimild lögreglu til að fara á spítala, með þeim fyrirvara að lögregla myndi sækja fjölskylduna klukkan fimm í nótt fyrir brottvísunarflugið.
Fram kemur í frásögn No Borders að konan hafi fengið vottorð á spítalanum um að henni væri ekki ráðlagt að fljúga vegna ástands síns. „Konan er komin út af mæðradeild þar sem hún fékk vottorð með upplýsingum um hversu langt hún væri gengin og að ekki væri mælt með að hún myndi fljúga. Venjulega þegar óléttar konur flúga þurfa þær að fá svokallað „fit to fly“ vottorð en engin fordæmi voru hins vegar fyrir að gefa „not fit to fly“ vottorð þar sem enginn læknanna hafði upplifað það áður að verið væri að neyða ólétta konu í flug gegn vilja hennar. Vonast er til að þetta vottorð hafi eitthvað að segja, en nú er hún á leið heim til sín þar sem lögreglan bíður,“ sögðu samtökin í nótt.
Samkvæmt sömu lýsingum taldi lögregla sig hins vegar hafa heimild frá trúnaðarlækni Útlendingastofnunar til að færa konuna í flug úr landi.
„Lögregla færði fjölskylduna inní bíl til að fara með uppá flugvöll.“
Um þrjú í nótt héldu samtökin áfram að lýsa framvindu mála. „Tveir lögreglumenn stoðdeildar komu og skoðuðu vottorðið frá meðgöngudeild landspítalans. Þeir sögðu að það skipti ekki neinu máli og að „trúnaðarlæknir“ Útlendingastofnunnar hefði ákveðið þetta. Konan man ekki eftir að hafa hitt lækni frá UTL en fór í blóðtöku hjá göngudeild hælisleitenda fyrir 10 dögum. Engar frekari skoðanir fór fram, fyrir utan skoðun frá ljosmæðrum á meðgöngudeild í kvöld. Þær mæla eindregið gegn því að brottvisunin væri fram.“
Í síðustu færslu samtakanna, klukkan fimm í nótt, kom fram að fjölskyldan hefði verið færð í lögreglubíl. „Lögreglan kom á brottrekstrarbíl og stuttu seinna flygdu tveir lögreglubílar með ljósin á. Lögreglan segist vera með “fit to fly” vottorð sem hún hefur ekki fengið að sjá og frá lækni sem hún hefur ekki hitt. Lögreglan kýs að styðjast við þetta vottorð frekar en það sem hún fékk frá ljósmóður á mæðra deild fyrr í kvöld. Lögregla færði fjölskylduna inní bíl til að fara með uppá flugvöll.“
Stundin reyndi að hafa samband við forstjóra og upplýsingafulltrúa Útlendingastofnunar, en hvorugt tók síma. Hvorki landlæknir né aðstoðarmaður landlæknis svöruðu símtölum og skilaboðum vegna málsins. Stundin heldur áfram umfjöllun um málið. Samkvæmt svörum frá Ríkislögreglustjóra verður unnt að fá svör þaðan um hádegi.
Samtökin No Borders fullyrða að fólkið hafi ekki fengið svar frá kærunefnd Útlendingamála.
Athugasemdir