Bjarni vill einkavæða Íslandspóst

Bjarni Bene­dikts­son, fjár­mála- og efna­hags­ráð­herra, vill einka­væða Íslands­póst þegar rekst­ur­inn er kom­inn í betra horf. Þetta segir hann í við­tali við Frétta­blaðið.

„Það hefur lengi verið mín skoðun að þegar búið er að koma lagaum­gjörð um þessa starf­semi í betra horf, eins og við höfum verið að gera núna, og gera nauð­syn­legar breyt­ingar á rekstr­inum þá sé ekk­ert því til fyr­ir­stöðu að ríkið selji þennan rekstur,“ segir Bjarni

Rík­is­end­ur­skoðun birti úttekt sína á rekstr­ar­vanda Íslands­pósts á þriðju­dag. Skýrslan er kurt­eis­lega orð­aður áfell­is­dómur yfir stjórn­völdum, stjórn­endum Íslands­pósts og þeim aðilum sem ber lögum sam­kvæmt að hafa eft­ir­lit með starf­semi fyr­ir­tæk­is­ins. Fram kemur að eig­enda­stefna og ytra eft­ir­lit með starf­semi Íslands­pósts hafi verið ófull­nægj­andi. Heild­ar­fjár­fest­ingar fyr­ir­tæk­is­ins árið 2018 hafi verið of miklar miðað við greiðslu­getu þess og fjár­fest­ingar í dóttur- og hlut­deild­ar­fé­lögum hafi ekki skilað þeirri sam­legð og arði sem að var stefnt. 

Að sögn Rík­is­end­ur­skoð­unar kall­aði fjár­mála­ráðu­neytið ítrekað eftir grein­ingum og upp­lýs­ingum um mál­efni Íslands­pósts án þess að grein­ing­ar­vinnan skil­aði sér til ráðu­neyt­is­ins. Þetta er athygl­is­vert í ljósi þess að aðstoð­ar­maður Bjarna Bene­dikts­sonar fjár­mála­ráð­herra, Svan­hildur Hólm Vals­dóttir, sat í stjórn Íslands­pósts frá 2014 þar til nú í vor og var lengst af vara­for­maður stjórnar.

Í við­tal­inu við Frétta­blaðið seg­ist Bjarni ekki hafa náð að fara yfir skýrsl­una sjálfur, en segir Íslands­póst vera með sjálf­stæða stjórn sem honum sýn­ist á fréttum að hafi brugð­ist við sumu af því sem fram kemur í skýrsl­unni. Málefni Íslands­pósts séu í góðum far­vegi núna innan stjórn­ar­innar, en sjálfur vilji hann selja rekst­ur­inn. „Hins vegar held ég að það hafi ekki verið aðstæður til þess und­an­farin miss­eri eða ár að hefja und­ir­bún­ing að slíkri sölu vegna þess hvernig rekst­ur­inn hefur gengið,“ segir Bjarni. „Okkur er það ljóst núna að til dæmis alþjón­ustu­kvöðin sem hvílt hefur á fyr­ir­tæk­inu hefur ekki verið nógu vel fjár­mögnuð sem birt­ist meðal ann­ars í nýlegum úrskurði Póst- og fjar­skipta­stofn­unar.“

„Að öðru leyti getur hún bara farið fram á sam­keppn­is­grund­velli“

Hann segir að þegar umbætur hafi verið gerðar á lagaum­gjörð­inni og rekst­ur­inn fari að skila árangri sé engin ástæða fyrir eignar­haldi rík­is­ins á fyr­ir­tæk­inu. „Þá er ég sér­stak­lega að vísa til þess að við höfum öll tök á verð­lagn­ingu þjón­ust­unnar sem við viljum hafa, þess­ari grunn­póst­þjón­ustu í land­inu. Að öðru leyti getur hún bara farið fram á sam­keppn­is­grund­velli. Það er hluti af þeirri þjón­ustu sem ber sig ekki á sam­keppn­is­grund­velli og þá verður ríkið að gera þjón­ustu­samn­ing um það og í þeim þjón­ustu­samn­ingi getum við ákveðið þjón­ustu­stigið og verð­lagn­ingu. En að öðru leyti eigi þetta fyr­ir­tæki bara að vera að keppa á sam­keppn­is­grund­velli.“