„Það er orðið of mikið sem þyrfti að breytast til að ég myndi vilja flytja aftur til baka,“ segir Íslendingur sem búsettur er í Svíþjóð aðspurður hvort hann hefði áhuga á því að flytja aftur til Íslands.
Stundin ræddi við nokkra Íslendinga á þrítugsaldri sem búsettir eru á Norðurlöndunum um hvers vegna þeir ákváðu að flytja frá Íslandi, hvernig það hafi verið að aðlagast nýju samfélagi og hvort þeir hafi áform um að snúa einhvern tíma aftur. Ástæður brottflutninganna voru margbreytilegar, til dæmis vegna námstækifæra, ástarinnar eða einfaldlega áhuga á því að prófa eitthvað nýtt. Flestir viðmælenda hafa þó ekki hugsað sér að flytja aftur heim til Íslands og bar húsnæðismarkaðinn iðulega á góma er spurt var hvort og þá hvað þyrfti að breytast í íslensku samfélagi svo að það kæmi til greina.
Um 47 þúsund Íslendinga búsettir erlendis
Fjöldi Íslendinga sem búa erlendis hefur aukist á undanförnum árum, en samkvæmt tölum frá Þjóðskrá Íslands eru 46.572 íslenskir ríkisborgarar með skráða búsetu erlendis. Þar af búa 62,8 prósent íslenskra ríkisborgara erlendis á Norðurlöndunum, en flestir þeirra eru í Danmörku.
Samkvæmt heimildum Vinnumálastofnunar er fólk á aldrinum 20–29 ára fjölmennasti aldurshópur Íslendinga sem flytja úr landi, en síðustu 30 ár hefur hlutfall þess hóps verið um 30 prósent allra brottfluttra Íslendinga.
Hlutfall aðfluttra Íslendinga í samanburði við brottflutta hefur undanfarin ár verið neikvætt, sem þýðir að á hverju ári flytja fleiri íslenskir ríkisborgarar frá landinu heldur en til þess. Sú þróun hefur þó snúist við frá og með árinu 2017, sé á heildarfjöldann litið, en hins vegar er hlutfallið enn neikvætt hjá aldurshópnum 20–29 ára þó svo að bilið fari minnkandi.
Ókeypis læknisþjónusta mikill kostur
Karen Guðnadóttir er 26 ára Keflvíkingur sem ákvað fyrir tveimur árum að flytja til smábæjarins Gråsten við landamæri Danmerkur og Þýskalands ásamt manninum sínum. „Við vorum búin að tala um það í nokkur ár að flyta til útlanda. Hvorugt okkar hafði búið annars staðar heldur en í Keflavík svo við ákváðum að flytja til Danmerkur því það er auðvelt fyrir Íslendinga að byrja þar.“
Athugasemdir