Háttsettur bandarískur embættismaður í baráttunni gegn hryðjuverkum sagði af sér í dag til að mótmæla stríði Bandaríkjanna og Ísraels gegn Íran og sagði að Bandaríkjunum stafaði enga yfirvofandi ógn af íslamska lýðveldinu.

„Ég get ekki með góðri samvisku stutt yfirstandandi stríð í Íran,“ sagði Joseph Kent, forstjóri Miðstöðvar gegn hryðjuverkum (NCTC), í afsagnarbréfi sínu til Donalds Trump forseta.

Kent – fyrrverandi meðlimur sérsveitarinnar Green Berets sem fór í margar herferðir – sagði að „Íran stafaði engin yfirvofandi ógn að þjóð okkar og það er ljóst að við hófum þetta stríð vegna þrýstings frá Ísrael og öflugum bandarískum hagsmunasamtökum þeirra.“

Kent, 45 ára, sem var skipaður af Trump til að stýra NCTC, er fyrsti háttsetti bandaríski embættismaðurinn til að segja af sér í stjórnartíð hans til að mótmæla stríðinu gegn Íran.

Trump, sem ræddi við fréttamenn í forsetaskrifstofunni, sakaði Kent um að vera „mjög veikur í öryggismálum“ og sagði að það væri „gott að hann sé farinn.“

Karoline Leavitt, fjölmiðlafulltrúi Hvíta hússins, hafnaði meintum „fölskum fullyrðingum“ í afsagnarbréfi Kents og sagði þá staðhæfingu að ákvörðunin um að fara í stríð hafi verið tekin „á grundvelli áhrifa annarra“ vera „móðgandi og hlægilega“.

„Eins og Trump forseti hefur skýrt og afdráttarlaust tekið fram, hafði hann sterkar og sannfærandi sannanir fyrir því að Íran ætlaði að ráðast fyrst á Bandaríkin,“ sagði Leavitt, en Trump hefur sagt að hann hafi haft „á tilfinningunni“ að Íran myndi gera árás, án þess að birta nokkrar sannanir þess.

„Trump forseti tók að lokum þá ákvörðun að sameiginleg árás með Ísrael myndi draga verulega úr áhættunni fyrir líf Bandaríkjamanna sem fylgdi fyrstu árás hryðjuverkastjórnarinnar í Íran og takast á við þessa yfirvofandi ógn við þjóðaröryggishagsmuni Bandaríkjanna,“ sagði hún.

Eiginkona Kents, Shannon, þjónaði einnig í bandaríska hernum og lést í sjálfsmorðssprengjuárás í Sýrlandi árið 2019.

„Sem ekkill sem missti ástkæra eiginkonu mína Shannon í stríði sem Ísrael bjó til, get ég ekki stutt það að senda næstu kynslóð til að berjast og deyja í stríði sem þjónar hvorkihagsmunum bandarísku þjóðarinnar né réttlætir kostnaðinn af lífi Bandaríkjamanna,“ skrifaði Kent.

Falsupplýsingaherferð

Sem yfirmaður NCTC starfaði Kent undir Tulsi Gabbard, yfirmanni leyniþjónustumála, við að greina og samræma viðbrögð Bandaríkjanna við hryðjuverkaógnum og starfaði sem aðalráðgjafi forsetans í baráttunni gegn hryðjuverkum.

„Fram í júní 2025 skildir þú að stríðin í Miðausturlöndum voru gildra sem rændi Bandaríkin dýrmætum lífum föðurlandsvina okkar og eyddi auði og velmegun þjóðar okkar,“ sagði Kent í bréfi sínu til Trumps, sem hann birti á X.

Kent sakaði „háttsetta ísraelska embættismenn og áhrifamikla meðlimi bandarískra fjölmiðla“ um að hafa staðið fyrir falsupplýsingaherferð sem „sáði árásargjörnum viðhorfum til að hvetja til stríðs við Íran.“

„Þessi bergmálshellir var notaður til að blekkja þig til að trúa því að Íran stafaði yfirvofandi ógn að Bandaríkjunum og að þú ættir að gera árás núna,“ sagði hann.

„Þetta var lygi og er sama aðferð og Ísraelar notuðu til að draga okkur inn í hið hörmulega Íraksstríð,“ sagði Kent.

„Ég get ekki stutt það að senda næstu kynslóð til að berjast og deyja í stríði sem þjónar engum hagsmunum bandarísku þjóðarinnar né réttlætir kostnaðinn af lífi Bandaríkjamanna,“ bætti hann við.

Mark Warner öldungadeildarþingmaður, æðsti demókrati í leyniþjónustunefnd öldungadeildarinnar, sagði að „ferill Kents sé mikið áhyggjuefni.“

„En í þessu máli hefur hann rétt fyrir sér: það voru engar trúverðugar sannanir fyrir yfirvofandi ógn frá Íran sem myndi réttlæta að Bandaríkin yrðu hrakin út í annað valkvætt stríð í Miðausturlöndum,“ sagði Warner.

Kent bauð sig tvisvar fram án árangurs – árin 2022 og 2024 – sem repúblikani með stuðning Trumps fyrir sæti í fulltrúadeild Bandaríkjaþings fyrir Washington-fylki.