Hvíta húsið sendi bandarískum þingmönnum í dag tillögu til fjárlaga þar sem kallað er eftir gríðarlegri aukningu á fjárveitingum til hernaðar á næsta ári vegna aukins kostnaðar sökum stríðsins gegn Íran, eða sem nemur 1,5 billjónum dala.
Heildaraukningin á milli ára í útgjöldum „stríðsmálaráðuneytisins“ Pentagon yrði sú mesta frá síðari heimsstyrjöldinni, að því er bandarískir fjölmiðlar greina frá, þótt fjárlagatillögur forseta séu óskalistar sem þingið þarf að samþykkja, frekar en bindandi fyrirmæli.
Hækkunin 42%
Beiðnin myndi fela í sér 42 prósenta hækkun á heildarfjárveitingu Pentagon fyrir árið 2026.
Hún er hluti af tillögu þar sem þingið er beðið um að skera niður útgjöld utan varnarmála um 73 milljarða dala, eða 10 prósent, með því að „draga úr eða útrýma „woke“, vopnvæddum og sóunarsömum áætlunum og með því að færa ábyrgð ríkja og sveitarfélaga aftur til viðkomandi stjórnvalda.“
Ekki er búist við að Pentagon birti nákvæma sundurliðun fjárlagabeiðninnar fyrr en síðar í þessum mánuði, en áætlunin gæti myndað ríkisfjármálaramma sem bætir billjónum við þegar vaxandi alríkisskuldir á næsta áratug, að því gefnu að þingið samþykki tillögur forsetans.
Athygli vekur þó að Trump boðaði strax í janúar að hann myndi fara fram á aukningu hernaðarútgjalda nokkru fyrir Íransstríðið, eða eins og orðaði það, að hann hefði ákveðið að auka útgjöldin. Þá sagðist hann hafa „ákvarðað“ að auka ætti fjárveitingar til hermála í Bandaríkjunum um helming á næsta ári, upp í 1,5 billjónir dala, til að takast á við „erfiða og hættulega tíma“, eins og Heimildin fjallaði um. Yfirlýsingin kom rúmlega viku eftir að hann hitti Benjamín Netanjahú, forsætisráðherra Ísraels, sem sagður var hafa lagt að honum að ráðast aftur á Íran, en í millitíðinni hafði Trump lukkast að handtaka forseta Venesúela í hernaðaraðgerð.
Vill skera niður félagslega aðstoð
Trump hvatti þingmenn til að samþykkja megnið af hækkuninni í gegnum hefðbundið árlegt fjármögnunarferli ríkisins, en afgreiða þá 350 milljarða dala sem eftir standa með sömu flokkspólitísku lagasetningu og gerði repúblikönum kleift að tryggja skattalækkanir án stuðnings demókrata á síðasta ári.
Í aðdraganda birtingar tillögunnar hafa forsetinn og ráðgjafar hans lagt áherslu á hversu brýnt sé að auka útgjöld til varnarmála og bent á nauðsyn þess að endurnýja vopnabirgðir og önnur hergögn í yfirstandandi átökum við Íran.
Í einkahádegisverði lagði Trump áherslu á að fjármögnun varnarmála ætti að ganga fyrir öðrum útgjöldum alríkisins, jafnvel þótt það þýddi að skera niður félagslega aðstoð og aðra hjálp.
„Það er ekki hægt fyrir okkur að sjá um dagvistun, Medicaid, Medicare, allt þetta einstaka, þeir geta gert það á grundvelli ríkja,“ sagði hann og bætti við að forgangsatriðið yrði að vera „hernaðarvernd.“
Hvíta húsið birti myndband af ummælum Trumps á YouTube-síðu sinni og eyddi því síðan.
Bæði demókratar og repúblikanar hafa nýlega lýst yfir áhyggjum af því að auka hernaðarútgjöld upp í þá upphæð sem Trump hefur lagt til og bent á að stjórnvöld hafi ekki veitt nægjanlegar upplýsingar um stríðið við Íran, sem nú hefur staðið í fimm vikur.
Athugasemdir (2)
Bandaríki Trumps
Verður Trump taminn eftir þingkosningar?
Trump stóreykur losun metans
Trump segir ummæli Obama um Cheesecake Factory dæma hann sjálfan
Reiður Trump ræðst gegn Norðmönnum
Trú og heift: Keppinautar í öldungadeild Texas með ólíka framtíðarsýn
Auk þess heimafyrir. þá ræðst hann á viðkvæmustu hópana en er sjálfur forréttindapési og afæta sem er á framfærslu annarra eins og kapítalistar almennt eru.
Hægrimenn sem styðja misskiptingu eru oftast einna hræddastir við innflytjendur og það að verða undir.
Þjóðarleiðtogar eru oft miklir egóistar og eru í stöðugri keppni um að vera fremstir. það er þessi keppni um að vera fremstir sem veldur brjálsemi þeirra - það kemst ekkert annað að. Sumir þeirra vita ekki afhverju þeir vilja vera þjóðarleiðtogar, þeir vita það eitt að þeir vilja vera fremstir.
Þjóðarleiðtogar eiga það til að fangelsa eða ryðja úr vegi stjórnarandstæðingum og þeim sem gætu átt til að gagnrýna þá, dómurum og blaðamönnum og stundum fara þeir í stríð. Ástæðan fyrir þessu gæti verið að þeir eru að verja þá hugmynd um sjálfa sig, um að vera fremstir og til að þessi sjálfsmynd bíði ekki hnekki, gera þeir hvað sem er. Þeir eru í raun hræddir menn að verja hugmyndina um sjálfa sig sem mikilmenni og númer eitt og ryðja þeim úr vegi sem gætu raskað þeirri hugmynd.
Rótin að þessu ástandi gæti verið lífsskoðun eins og sú, að láta engan vaða yfir sig. Í slíku lífsviðhorfi felst átök, jafnvel átakasækni (til að sanna sig) og ákveðin mikilmennskukennd, því ef enginn getur vaðið yfir viðkomandi þá hlýtur hann að vera númer eitt?
Mótefnið við þessu kann að vera "jafnaðarmennska", tilfinningaleg meðvitund, kærleikur, átakafælni og muna að fæstir eru fullkomnir?