„Sá sem hefur tekið þessi börn eða er með þau hjá sér, hann mun finn­ast. Hann ætti að vakna á hverjum degi og bíða þess að yfir­völd banki á hurð­ina hjá honum,“ segir Sjak R. Haaheim, lög­maður barns­föður Eddu Bjarkar Arn­ar­dóttur. 

Faðirinn er nú hér á landi og leitar sona sinna. 

Edda Björk var á þriðju­dag færð í gæslu­varð­hald á Hólms­heiði vegna kom­andi rétt­ar­halda yfir henni í Noregi. Hún var síðan flutt með valdi af lög­reglu­mönnum frá Hólms­heiði fyrr í dag og er útlit fyrir að hún sé nú á leið til Noregs. Dag­setn­ing fyrir rétt­ar­höldin hefur ekki verið gefin út.

Ástæða þessa er for­sjár­deila sem Edda og barns­faðir hennar standa í vegna þriggja sona þeirra. Norskir dóm­stólar hafa kom­ist að þeirri nið­ur­stöðu að þeir eigi að búa hjá föður sínum en Edda fór þrátt fyrir það með syni sína til Íslands fyrir um einu og hálfu ári síðan og hér hafa þeir búið síðan þá. Edda hefur verið kærð fyrir að nema dreng­ina á brott. Lengsti mögu­legi fang­els­is­dómur sem hún gæti fengið hljóðar upp á sex ár.

Nú eru drengirnir í felum, óljóst er hver tók ákvörðun um að fela þá og hvar þeir eru nið­ur­komnir. Fjöl­skylda Eddu hefur sagt þá vera örugga og að þeim líði vel. 

„Umbjóð­andi minn ætlar að vera á Íslandi þangað til börn­unum er komið með öruggum hætti aftur heim [til Noregs],“ segir Sjak. „Ég skil það þannig að yfir­völd viti ekki einu sinni hvar synir hans eru.“

Sá sem hýsir börnin eigi að stíga fram

Faðirinn kallar eftir því að hver sá sem veit hvar synir hans eru nið­ur­komnir láti lög­regl­una vita, segir Sjak sem telur að mann­eskjan sem nú hýsi börnin gæti verið að fremja lög­brot. 

LögmaðurSjak R. Haaheim.

„Við búumst við því að sá sem er með börnin stígi fram innan sól­ar­hrings,“ segir Sjak. 

Hann telur að fram að þessu hafi verið ein­blínt um of á rétt­indi móð­ur­innar Eddu og tími sé til kom­inn að setja hag drengj­anna í for­grunn. „Þeir búa í Noregi,“ segir Sjak. 

En nú eru þeir á Íslandi? 

„Lagalega séð búa þeir í Noregi,“ segir Sjak sem ætlar að kalla eftir því að drengirnir fái rétt­ar­gæslu­mann. „Við rétt­ar­höldin í Noregi mun sér­fræði­vitni bera vitni um það hvaða skaða valdið börnum að taka þau frá vinum sínum og úr skóla með því að fela þau ein­hvers­staðar.“ 

En nú hafa drengirnir skapað sér líf á Íslandi, gæti það ekki skaðað þá að fara aftur til Noregs? 

„Þeir hafa skapað sér líf í Noregi. Þeir munu snúa þangað aftur, þeir hafa varið meiri­hluta ævinnar í Noregi.“ 

Hvað ef þeir hafna því að fara aftur? 

„Þeir hafa ekki neitað því að fara. Múgur hefur reynt að koma í veg fyrir fram­gang rétt­læt­is­ins. Það er ekk­ert til að vera stoltur af. Börnin vilja fara heim en þeim hefur verið neitað um aug­ljós rétt­indi sín.“ 

Aðspurður segir Sjak að fað­ir­inn hafi ekki kallað eftir hand­töku Eddu, það hafi verið aðgerðir á vegum norskra og íslenskra yfir­valda. Aftur á móti segir hann að erfitt hafi verið að fá íslensk yfir­völd til sam­starfs. „Norð­ur­löndin ættu að vinna saman í svona málum,“ segir Sjak.