„Hvað er ég að gera við líf mitt?“

„Ég sá fólk skauta á tjörn­inni því hún er frosin og fyrst ég á skauta ákvað ég að gera það sama. Einu sinni í viku æfi ég skauta, en mig hefur langað til þess frá því að ég var lítil og byrj­aði síð­asta haust þegar ég flutti til Reykja­víkur frá litlum bæ á Vest­fjörðum sem heitir Ísa­fjörður. Það er svaka­lega mikil breyt­ing að vera komin hingað og venj­ast Reykja­vík, umferð­inni, fólk­inu og hvernig allt virkar öðru­vísi hér en á Ísafirði. 

Ekkert hefur breytt lífi mínu meira en að fara til Dan­merkur í lýð­há­skóla. Mér fannst það breyta því hvernig ég horfi á hlut­ina og hvernig ég sé sjálfa mig. Mér finnst eins og það hafi ýtt mér í að flytja að heiman og koma til Reykja­víkur til að prófa nýja hluti. 

Þegar ég var í Danmörku var svo margt sem ég gat lært, sem ég gat ekki lært heima hjá fjöl­skyld­unni minni. Þá var ég svo mik­ill hluti af fjöl­skyld­unni og skil­greindi mig út frá henni. Fjöl­skyldan var oft að segja mér hvernig ég væri en úti fann ég að ég var ekki þannig. Nú bý ég með afa sem er ágætt, en dálítið erfitt því við höfum aldrei verið mjög náin. Við erum að læra það.

Þessa dag­ana er ég mest að hugsa um hvað ég er að gera við líf mitt. Ég er tví­tug og er mjög týnd í líf­inu akkúrat núna. Ég veit ekki alveg hvað ég vil gera þótt ég sé alltaf að hugsa um það. Mig langar í skóla en veit ekki hvað mig langar að læra. Ég veit samt að ég hef áhuga á listum eins og graf­ískri hönnun, vatns­litum, mynd­list og að búa til tón­list.“