Alls segjast 42,8 prósent landsmanna vera hlynnt inngöngu Íslands í Evrópusambandið en 35,1 prósent eru andvíg því og 22,1 prósent eru óviss um afstöðu sína. Þetta er niðurstaða nýrrar könnunar Prósents um málið en niðurstöður hennar eru birtar í Fréttablaðinu í dag.
Þar kemur fram að stuðningur við aðild sé afgerandi á höfuðborgarsvæðinu, þar sem 47 prósent styðja hana en 30 prósent eru á móti. Á landsbyggðinni mælist andstaða við aðild hins vegar nú meiri en stuðningur, en 35 prósent svarenda á henni segjast vilja ganga í Evrópusambandið á meðan að 44 prósent eru því mótfallinn.
Kjósendur Pírata og Viðreisnar mest fylgjandi
Frá því að Prósent kannaði síðast hug landsmanna til aðildar í júní hefur þeim sem eru fylgjandi aðild fækkað um 5,5 prósentustig, óákveðnum fjölgað 4,3 prósentustig og þeim sem eru andvígir fjölgað um 1,2 prósentustig.
[adspot]Mest hefur dregið úr stuðningi við aðild á meðal þeirra sem segjast ætla að kjósa Samfylkinguna og mælist stuðningur við aðild nú meiri á meðal kjósenda bæði Viðreisnar og Pírata. Fylgi Samfylkingarinnar hefur tekið kipp upp á við undanfarið og mældist 19,1 prósent í sömu könnun Prósents, sem er 5,6 prósentustigum meira en flokkurinn mældist með í júní. Hópurinn sem segist ætla að kjósa Samfylkinguna hefur því stækkað umtalsvert.
Milli kannana hefur orðið sú breyting á að Kristrún Frostadóttir var kjörin formaður Samfylkingarinnar. Hún sagði í viðtali við Kjarnann í september, eftir að hafa tilkynnt um framboð, að stefna flokksins hvað varðar aðild að Evrópusambandinu væri alveg skýr og verði það áfram. „Við höfum verið fylgjandi Evrópusambandsaðild. Ég er sjálf stuðningsmaður Evrópusambandsins. Ég er hins vegar líka meðvituð um það að eins og er þá er ekki þingmeirihluti fyrir málinu þótt kannanir séu að fara upp á við varðandi viðhorf þjóðarinnar gagnvart aðild. Fyrsta skrefið fyrir mér er að spyrja þjóðina hvort við eigum að fara í þetta verkefni. Leggja aðildarviðræður í þjóðaratkvæðagreiðslu og taka svo stöðuna í kjölfarið.“ Í Fréttablaðinu í dag segir Kristrún að það geti verið að fólk sem tengir sig við jafnaðarstefnuna í grunninn en hafi varnagla gagnvart Evrópusambandinu sé að koma aftur til flokksins.
Fleiri eru fylgjandi aðild en andvígir henni á meðal kjósenda bæði Sósíalistaflokks Íslands og Vinstri grænna, flokks forsætisráðherra sem hefur þá yfirlýstu stefnu að telja hag Íslands betur borgið utan sambandsins. Minnstur er stuðningur við aðild á meðal kjósenda Sjálfstæðisflokks (19 prósent) og Miðflokks (ellefu prósent).
[adspot]Miðað við niðurstöðu síðustu kosninga, sem fram fóru í fyrrahaust, eru þeir flokkar þar sem fleiri kjósendur eru fylgjandi aðild en á móti með 25 þingmenn, og töluvert frá því að vera með meirihluta á þingi. Samkvæmt könnun Prósents myndu sömu flokkar hins vegar fá 34 þingmenn kjörna ef kosið yrði í dag, sem þýðir að þeir væru með meirihluta á þingi.
Viðsnúningur eftir rúman áratug af andstöðu
Í mars birtust niðurstöður úr Þjóðarpúlsi Gallup sem sýndu að 47 prósent landsmanna væru hlynnt aðild að Evrópusambandinu en 33 prósent mótfallin henni. Það var í fyrsta sinn frá árinu 2009 sem meirihluti mældist fyrir aðild í könnunum hérlendis.
[links]Hlutfall sem eru hlynntir inngöngu Íslands í sambandið hafði raunar ekki mælst meira en rúmlega 37 prósent í mánaðarlegum könnunum sem MMR framkvæmdi frá 2011 og út síðasta ár. Í síðustu könnun fyrirtækisins, sem var gerð í desember í fyrra, mældist stuðningurinn 30,4 prósent en 44,1 prósent voru á móti.
Í könnun Prósents í júní var niðurstaðan svipuð og hjá Gallup í mars, 48,5 prósent sögðust hlynnt aðild en 34,9 prósent voru andvíg. Alls 16,7 prósent sögðust ekki hafa neina skoðun á málinu.
Því liggur fyrir að í þremur könnunum í röð hafa fleiri svarendur verið á þeirri skoðun að Ísland eigi að ganga í Evrópusambandið en á móti aðild.
Könnun Prósents sem birt var í Fréttablaðinu í dag var framkvæmd 14. til 17. nóvember. Úrtakið var 2.600 og svarhlutfallið 51,3 prósent.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
kannanir
Svona er afstaða þjóðarinnar í lykilmálum samkvæmt skoðanakönnunum ársins 2022
Allir formenn stjórnarflokkanna tapað umtalsverðu trausti á kjörtímabilinu
Allir ráðherrar VG og Framsóknar tapa trausti en ráðherrar Sjálfstæðisflokks bæta við sig
Nærri helmingur Íslendinga hlynntur aðild að Evrópusambandinu
Næstum helmingur tekjuhæstu kjósendanna styðja Sjálfstæðisflokk eða Viðreisn
Athugasemdir