Vilja að fyrrverandi fangar fái atvinnuleysisbætur eftir afplánun

Einn þing­maður Fram­sókn­ar­flokks og tveir þing­menn Pírata hafa lagt fram þings­á­lykt­un­ar­til­lögu um að fela Ásmundi Einari Daðasyni, félags- og barna­mála­ráð­herra, að beita sér fyrir því að ein­stak­lingar sem setið hafa í gæslu­varð­haldi eða afplánað refsi­vist og stundað vinnu, nám eða starfs­þjálfun til sam­ræmis við lög um fulln­ustu refs­inga ávinni sér rétt til atvinnu­leys­is­bóta meðan á varð­haldi eða vist stendur.

Samkvæmt til­lög­unni, sem Silja Dögg Gunn­ars­dóttir er fyrsti flutn­ings­maður að og Helgi Hrafn Gunn­ars­son og Björn Leví Gunn­ars­son er einnig skrif­aðir fyrir, á ráð­herr­ann að leggja fyrir Alþingi frum­varp sem miðar að þeim mark­miðum sem sett eru fram í til­lög­unni á haust­þingi 2020.

Í grein­ar­gerð sem fylgir þings­á­lykt­un­ar­til­lög­unni segir að flutn­ings­menn­irnir þrír telji að núver­andi kerfi auki líkur á því að ein­stak­lingar sem lokið hafa afplánun brjóti af sér á ný og vinni þannig gegn mark­miðum refsi­vörslu­kerf­is­ins um betrun.

[adspot]Ein­stak­lingar sem lokið hafi afplánun búi oft við mikið fjár­hags­legt óör­yggi auk þess sem þeir njóta ekki sömu félags­legu rétt­inda og ein­stak­lingar sem hafa verið á vinnu­mark­aði. „Leggja þarf aukna áherslu á að skapa verði jákvæða hvata til náms og starfs­þjálf­unar meðan á afplánun stendur. Liður í því er að tryggja að ein­stak­lingar sem stunda nám, vinnu eða starfs­þjálfun meðan á afplánun stendur ávinni sér rétt til atvinnu­leys­is­bóta. Einnig leggja flutn­ings­menn áherslu á að sam­hliða þeim breyt­ingum sem lagðar eru til í þurfi að móta heild­stæða betr­un­ar­stefnu. Í því felst m.a. að auka fjöl­breytni starfa í fang­elsum og bæta aðgengi að menntun.“

Finnland er sem stendur eina ríkið á Norð­ur­lönd­unum sem veitir ein­stak­lingum sem nýlega hafa lokið afplánun afkomu­bætur úr atvinnu­leys­is­trygg­inga­sjóðum fag­fé­laga ef umsækj­andi er atvinnu­laus og getur sýnt fram á að vera í virkri atvinnu­leit.