„Lágmarkskrafa að Eyþór Arnalds og Samherji geri hreint fyrir sínum dyrum“

Dagur B. Egg­erts­son borg­ar­stjóri segir að það gangi ekki að ótal spurn­ingum sé ósvarað um við­skipti Samherja og Eyþórs Arn­alds, odd­vita Sjálf­­stæð­is­­flokks í borg­­ar­­stjórn Reykja­vík­­­ur. „Það hlýtur að vera lág­marks­krafa að Eyþór Arnalds og Samherji geri hreint fyrir sínum dyrum,“ segir Dagur í Facebook-færslu í dag.

Dagur rekur í færsl­unni að í dag sé vika frá því að Sam­herj­a­skjölin voru birt þar sem sögð hafi verið skýr saga af „ömur­legum við­skipta­háttum og arðráni Samherja í Namibíu“. Hann segir að birt­ing Sam­herj­a­skjal­anna sýni meint við­skipti Eyþór Arnalds við Samherja um hlut í Morg­un­blað­inu í alveg nýju ljósi. „Ég segi meint því lang­flest er á huldu um þessa fjár­mála­gjörn­inga sem teygja sig alla leið í skatta­skjóls­fyr­ir­tæki Samherja á Kýpur þaðan sem greiðslur til stjórn­mála­manna og milli­liða í Namibíu komu,“ skrifar Dagur.

Hann ítrekar jafn­framt að þetta mál Eyþórs sé ekki nýtt mál í umræð­unni heldur í raun tveggja ára gam­alt. Á þeim tíma hafi svörin aftur á móti verið fá og afar mis­vísandi. Dagur bendir jafn­framt á að Eyþór hafi ekki séð ástæðu til þess að geta um eign­ar­hald sitt í Morg­un­blað­inu eða „marg­flókin“ við­skipti sín við Samherja í hags­muna­skrán­ingu kjör­inna full­trúa hjá borg­inni.

„Við megum heldur ekki gleyma því að fjöl­miðlar gegna lyk­il­hlut­verki í sam­fé­lag­inu og eru í raun hluti af lýð­ræð­is­kerf­inu. Þess vegna hefur verið gerð sú krafa að ekk­ert sé á huldu varð­andi eign­ar­hald á þeim,“ segir Dagur og bætir við að í þessu máli standi eftir ótal spurn­ingar.

Þar á meðal hver sé ástæða þess að Eyþór fari með hlut Samherja í Morg­un­blað­inu ef hann tók enga áhættu af við­skipt­unum, líkt og Eyþór hefur sagt. Dagur spyr jafn­framt hvort að Eyþór standi enn í skuld við Samherja vegna þessa mál og hvenær hann ætli sér að gera fulla grein fyrir tengslum sínum við útgerð­ar­fyr­ir­tækið.

„Eins og blasir við rekst hvað á annað horn í skýr­ingum sem settar hafa verið fram á við­skiptum Samherja og odd­vita Sjálf­stæð­is­flokks­ins á eign­ar­hlut í Morg­un­blað­inu. Og ótal spurn­ingum er ósvarað. Það gengur ekki. Það hlýtur að vera lág­marks­krafa að Eyþór Arnalds og Samherji geri hreint fyrir sínum dyrum,“ segir Dagur að lokum.