Lánasjóður íslenskra námsmanna hefur gert samninga við þrjár lögmannsstofur um innheimtuþjónustu undanfarin ár án útboðs. Upplýsingar um kostnað LÍN af málarekstri sjóðsins fyrir dómstólum eru ófáanlegar, enda hefur sjóðurinn ekki haldið utan um slíka aðkeypta lögfræðiþjónustu í bókhaldi sínu.
Þetta kemur fram í svörum Kristjáns Þórs Júlíussonar, mennta- og menningarmálaráðherra, við fyrirspurnum Ástu Guðrúnar Helgadóttur, þingkonu Pírata, um málefni lánasjóðsins.
Löginnheimta LÍN hefur undanfarin ár verið í umsjá Gjaldskila, TCM og Löginnheimtunnar. Gjaldskil er sameiginlegt innheimtufélag lögmannsstofanna Juris og Lex. Báðar stofurnar hafa nýlega verið í kastljósinu í tengslum við embættisfærslur ráðherra Sjálfstæðisflokksins, meðal annars eftir að Ríkisendurskoðun gerði athugasemdir við 107 milljóna þjónustukaup fjármálaráðuneytisins af Juris í ráðherratíð Bjarna Benediktssonar. Annar af tveimur stjórnarmönnum Gjaldskila er fyrrverandi framkvæmdastjóri þingflokks Sjálfstæðisflokksins og faðir núverandi formanns allsherjar- og menntamálanefndar Alþingis.
Í svari Kristjáns Þórs Júlíussonar við fyrirspurn Ástu Guðrúnar kemur fram að Lánasjóðurinn hafi endurskoðað samninga sína við löginnheimtuaðila árið 2016 og fækkað þeim lögmannsstofum sem sjá um innheimtu fyrir hönd sjóðsins úr þremur í tvær. Bent er á að löginnheimta er undanskilin útboðskyldu, sbr. 11. gr. laga nr. 120/2016, og því sé lánasjóðnum ekki skylt að bjóða út slíka þjónustu. Það sé jafnframt „mat Lánasjóðs íslenskra námsmanna að almennt útboð henti ekki vel til að ná hagstæðum samningum í lögfræðiþjónustu og löginnheimtu“.
Ásta Guðrún spurði einnig um kostnað Lánasjóðs íslenskra námsmanna við málarekstur fyrir íslenskum dómstólum frá árinu 2000. „Fyrirspurnin var send til Lánasjóðs íslenskra námsmanna en þaðan fengust þau svör að ekki væri haldið sérstaklega utan um lögfræðikostnað í bókhaldi sem væri tilkominn vegna málareksturs sjóðsins,“ segir í svari ráðherra. „Aðkeypt lögfræðiþjónusta væri margvísleg, t.d. vegna almennrar innheimtuþjónustu, málareksturs fyrir dómstólum, gerðar minnisblaða o.s.frv.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
ACD-ríkisstjórnin
„Fáránleika-raunsæi eða raunsæislegur fáránleiki“
Ráðherra braut lög þegar hann setti rektor án auglýsingar
Unnu náið með hæstaréttardómurunum meðan þeir dæmdu Arnfríðarmál
Þorsteinn: Jafnvel enn alvarlegra en málið sem varð síðustu ríkisstjórn að falli
Frumgjöld verða 35 milljörðum hærri á næsta ári heldur en fyrri ríkisstjórn stefndi að
Athugasemdir