Lög­reglan á Akureyri lagði í gær hald á nokkra tugi lítra af natr­íum­klóríð ásamt sítrónu­sýru og umbúðum til fram­leiðslu á svo­kall­aðri krafta­verka­lausn eða MMS. Nokkrir hafa verið yfir­heyrðir í tengslum við málið og er rann­sókn langt komin sam­kvæmt upp­lýs­ingum frá lög­reglu. Engin hætta var talin stafa af efn­unum. 

Stundin greindi frá því í gær að hús­leit hefði verið gerð í verk­smiðju á Akureyri og þar lagt hald á „krafta­verka­lausn­ina“ MMS. Varað hefur verið við því að krafta­verka­lausnin geti valdið veik­indum eða dauða. Fram­leið­and­inn, Jóhannes Bjarmars­son, full­yrðir hins vegar að lyfið geti læknað allt frá krabba­meini til malaríu. 

„Þetta var nú engin verk­smiðja,“ segir Gunnar Jóhanns­son, hjá rann­sókn­ar­lög­regl­unni á Akureyri, í sam­tali við Stundina. „Á heima­síð­unni aug­lýsa þeir að það sé verk­smiðja í þessu ákveðna hús­næði. Okkur barst kæra frá Heil­brigð­is­eft­ir­liti norð­ur­lands eystra, sem hafði haft af því spurnir að þarna væri verið að reyna að búa til þetta efni, MMS. Við fórum og könn­uðum þetta og þarna var aðstaða til að blanda saman þessum efnum. Þetta var allt mjög lítið í sniðum,“ segir hann.  

Lög­reglan lagði þó ekki ein­ungis hald á klór heldur voru einnig lagt hald á 58 kanna­bis­plöntur og um 100 grömm af kanna­bis­efnum. Samkvæmt til­kynn­ingu lög­regl­unnar á Akureyri fund­ust fíkni­efnin ekki í verk­smiðj­unni á Akureyri heldur á sveitabæ í umdæm­inu. Ljóst er af Facebook síðu Jóhann­esar að hann er áhuga­maður um kanna­bis og af mynd­unum sem hann deilir að dæmi virð­ist hann trúa á lækn­ing­ar­kraft plönt­unnar.