Brynjar: Fólk sem á bíl getur ekki verið fátækt

Brynjar Níelsson, þing­maður Sjálf­stæð­is­flokks­ins og for­maður stjórn­skip­unar- og eft­ir­lits­nefndar Alþingis, telur að eig­endur bif­reiða geti ekki talist fátækir. 

Þetta kemur fram í umræðum sem Brynjar tekur þátt í á Facebook, en til­efnið er gagn­rýni Sigurðar Hólm Gunn­ars­sonar, iðju­þjálfa og for­stöðu­manns á skamm­tíma­heim­ili fyrir ung­linga í Reykja­vík, á áform sam­göngu­ráð­herra um að leggja veg­tolla á öku­menn. „Þegar sam­göngu­ráð­herra Sjálf­stæð­is­flokks­ins leggur til skatta­hækkun á lands­menn (sem hann kallar vega­tolla) er það auð­vitað FLATUR skattur. Skattur sem leggst jafnt á ríka sem fátæka,“ skrifar Sigurður. 

Brynjar bregst við með þeim orðum að fátækir geti hvorki átt bíl né rekið. „Þú ert ekki fátækur ef þú átt bíl og getur rekið hann,“ skrifar Brynjar og segir málið snú­ast um skil­grein­ingu á fátækt. „Ríkur maður getur ákveðið að eiga ekki bíl. En sá sem ákveður að eyða fé sínu í bíl getur ekki talist fátækur.“ 

Athygli vakti í fyrra þegar Brynjar hædd­ist að hug­myndum um að tann­lækn­ingar og sál­fræði­þjón­usta yrði aðgengi­leg öllum lands­mönnum óháð efna­hag. Sagði Brynjar að Píratar vildu að iðju­leys­ingjar gætu „setið heima við tölv­una á borg­ara­launum, legið í sóf­anum hjá sál­fræð­ingum dag­inn út og inn og látið hvítta tenn­urnar, allt í boði skatt­greið­enda“.