„Brjálæðingur“ verði forseti: Trump gengur lengra eftir skotárás

Donald Trump, for­seta­fram­bjóð­andi Repúblik­ana flokks­ins, gengur nú enn lengra í hug­myndum sínum um að mis­muna fólki eftir trú­ar­brögðum vegna hryðju­verkaógn­ar­innar í til­efni af skotárás í Orlando þar sem um 50 manns voru myrtir á næt­ur­klúbbi fyrir sam­kyn­hneigða.

Eftir árás­ina þakk­aði Trump þeim sem sögðu hann hafa haft rétt fyrir sér með áformum um að banna ferðir múslima til Banda­ríkj­anna, þar sem árás­armað­ur­inn í Orlando var múslimi. Árás­armað­ur­inn var hins vegar fæddur í Banda­ríkj­unum.

„Ógnvekjandi“ ræða „brjálæðings“

Í dag hélt Trump ræðu þar sem hann skor­aði á þingið að reyna að standa í vegi fyrir lokun landamær­anna gagn­vart múslimum, ýjaði að því að Barack Obama væri hlynntur íslamískum hryðju­verka­mönnum, kall­aði eftir afsögn for­set­ans og sagð­ist vilja refsa fólki sem til­kynnti ekki um grun­sam­legt atferli.

Trump var­aði aftur við múslimum og boð­aði lokun landamær­anna gagn­vart þeim. „Við þurfum líka að segja sann­leik­ann um hvernig öfga­fullt íslam er að koma að ströndum okkar. Og það kemur, með þessu fólki kemur það. Við erum að flytja rót­tæka íslamska hryðju­verka­menn í vestrið með mis­heppn­uðu inn­flytj­enda­kerfi og með leyni­þjón­ustu sem for­set­inn heldur aftur af,“ sagði Trump í dag.

Hann sagði van­hæfni vera ríkj­andi við stjórn Banda­ríkj­anna, en að ef hann yrði kos­inn, yrði and­stæða van­hæfni að veru­leika. „Við verðum að stjórna landa­mær­unum okkar. Við verðum að stjórna þeim núna, ekki seinna, núna.“

Vef­mið­ill­inn The Huffington Post kallar Trump „brjál­æð­ing“ í for­síðu­fyr­i­s­ögn, segir ræðu hans ógn­vekj­andi og segir hann ala á ótta vegna flótta­manna­krís­unnar.

Ræða Trumps í heild sinni. Hana má lesa á síðu Trumps hér.

Útilokar hluta heimsins

„Ég vil þá ekki í land­inu okkar,“ sagði Trump í ræðu sinni í Anselm-skól­anum í New Hamps­hire í dag. „Ég mun stöðva inn­flutn­ing fólks frá svæðum heims­ins þar sem er stað­fest saga hryðju­verka gegn Banda­ríkj­unum, Evrópu og banda­mönnum okkar, þar til við skiljum fylli­lega hvernig megi binda enda á þessar ógnir.“

„En múslim­arnir þurfa að vinna með okkur.“

Trump vill refsa almennum borg­urum fyrir að til­kynna ekki grun­sam­legt atferli. „Ég vil að allir Banda­ríkja­menn njóti vel­gengni, líka múslimar. En múslim­arnir þurfa að vinna með okkur. Þeir verða að vinna með okkur. Þeir vita hvað er að ger­ast. Þeir vita að hann var vondur. Þeir vissu að fólkið í San Bern­ar­dino [þar sem önnur árás fór fram] væri vont. En vitið þið hvað? Þau vís­uðu ekki á það.“

Nágrannar hjón­anna í San Bern­ar­dino í Suður-Kali­forníu, sem  myrtu 14 og særðu 22 í des­em­ber í fyrra, lýstu þeim hins vegar sem „rólegu, trú­uðu fólki sem vöktu ekki athygli eða grun­semdir“.

Nú segir Trump að þeir sem hafi vitað eitt­hvað en ekk­ert sagt „þurfi að þola afleið­ingar, alvar­legar afleið­ingar“.

Trump hefur áður skorað á fólk að fylgj­ast með nágrönnum sínum og til­kynna þá ef þeir virð­ast grun­sam­legir. „Lík­leg­ast hef­urðu rangt fyrir þér, en það er allt í lagi. Það er besta leiðin. Allir eru lög­regla, á sinn hátt.“

„Allir eru lög­regla, á sinn hátt“

Árás­armað­ur­inn í Orlando fædd­ist árið 1986 í Banda­ríkj­unum, sonur afganskra for­eldra. Á þeim tíma voru Banda­ríkin og Afganistan sam­herjar í bar­átt­unni við Sov­ét­ríkin. 

Forsíða Huffington Post Vef­mið­ill­inn Huffington Post varar við múgsefjun Donalds Trump.

Mynd: Huffington Post

Útilokar Washington Post

Trump til­kynnti í dag að hann myndi svipta Washington Post blaða­mannapassa, þar sem mið­ill­inn væri „falskur og óheið­ar­legur“.

Til­kynn­ingin kom í kjöl­far þess að mið­ill­inn benti á orð Trumps, þar sem hann ýjar að því að Obama hafi ann­ar­legan ásetn­ing gagn­vart íslamískum hryðju­verka­mönnum. „Það er eitt­hvað í gangi,“ sagði Trump meðal ann­ars, en Washington Post fjall­aði um málið undir fyr­ir­sögn­inni „Trump virð­ist tengja Obama for­seta við skotárás­ina í Orlando“.

Aðal­rit­stjóri Washington Post, Marty Baron, segir að ákvörð­unin sé „ekk­ert annað en höfnun á hlut­verki frjálsra og sjálf­stæðra fjöl­miðla“.

Huffington Post, ein vin­sælasta frétta­vef­síða Banda­ríkj­anna, lýkur öllum greinum um Donald Trump á árétt­ingu: „Athuga­semd rit­stjórnar: Donald Trump hvetur reglu­lega til stjórn­mála­legs ofbeldis og er rað­lyg­ari, svæs­inn útlend­inga­hat­ari, kyn­þátta­hat­ari, kven­hat­ari og „birther“ [sá sem efast um að Obama hafi fæðst í Banda­ríkj­unum], sem hefur ítrekað heitið því að úti­loka alla múslima - 1,6 millj­arða manns heilla trú­ar­bragða - frá því að koma til Banda­ríkj­anna.