Sigríður ósammála héraðsdómi, segist engin mistök hafa gert og biðst ekki afsökunar

Ef Sigríður Andersen dóms­mála­ráð­herra hefði farið að lögum við und­ir­bún­ing og skipun dóm­ara við Lands­rétt og lagt for­svar­an­legt mat á hæfni umsækj­enda hefðu Jón Hösk­ulds­son og Eiríkur Jónsson hlotið skipun. Hér­aðs­dómur Reykja­víkur telur að leiddar hafi verið nægi­lega sterkar líkur að þessu til að Jón og Eiríkur eigi rétt á skaða­bótum vegna lög­brota dóms­mála­ráð­herra við með­ferð máls­ins. Athafnir ráð­herra hafi bakað þeim fjár­hags­legt tjón. 

Þetta er nið­ur­staðan í tveimur dómum hér­aðs­dóms sem kveðnir voru upp í gær. Ríkið var dæmt til að greiða Jóni Hösk­ulds­syni 4 millj­ónir í skaða­bætur og 1,1 milljón í miska­bætur vegna lög­brota dóms­mála­ráð­herra auk máls­kostn­aðar. Þá við­ur­kenndi dóm­ur­inn bóta­skyldu „vegna tjóns [Eiríks Jóns­sonar] af völdum þess að hann var ekki skip­aður í eitt af 15 emb­ættum dóm­ara við Lands­rétt sem aug­lýst voru laus til umsóknar 10. febr­úar 2017“.  

Í dómunum kemur fram að á grund­velli fyr­ir­liggj­andi gagna sé ekki hægt að slá því föstu að ráð­herra hafi látið fara fram sam­an­burð á umsækj­endum sem full­nægi þeim kröfum sem taldar eru hluti af grund­vall­ar­reglum í stjórn­sýslu­rétti um und­ir­bún­ing stöðu­veit­ingar og mat á hæfni umsækj­enda.

„Í því sam­bandi verður að leggja áherslu á að ákvörðun um skipun í opin­bert emb­ætti verður að byggj­ast á sam­an­burði á umsækj­endum á sam­bæri­legum grund­velli sem leiði í ljós hver er hæf­astur til að gegna starf­inu en ekki bara rétt­læt­ingu á því hvern ráð­herra vill skipa í emb­ættið,“ segir í dómunum. 

Þrátt fyrir að ríkið hafi verið dæmt skaða­bóta­skylt vegna athafna ráð­herra við­ur­kennir Sigríður Andersen dóms­mála­ráð­herra ekki að hafa gert nein mis­tök við með­ferð máls­ins.

„Nei, á þeim tíma þegar ég stóð frammi fyrir mál­inu þá get ég ekki fall­ist á að mér hafi verið unnt að haga þessum málum með öðrum hætti,“ sagði hún í Kast­ljós­svið­tali í gær. Þá sagð­ist hún ekki fall­ast á að „þetta ágæta fólk [hefði] orðið fyrir ein­hverjum miska“ og ekki ætla að biðja Jón og Eirík afsök­unar á brot­unum.

Segir manninn ekki eiga rétt á því að fá starfið

Áslaug Arna Sig­ur­björns­dóttirþing­kona Sjálf­stæð­is­flokks­ins

Mynd: xd.is

Í kvöld­fréttum í gær sagði Áslaug Arna Sig­ur­björns­dóttir, þing­kona Sjálf­stæð­is­flokks­ins, að Jón Hösk­ulds­son hefði ekki átt rétt á því sam­kvæmt lögum að vera skip­aður í emb­ætti dóm­ara við Lands­rétt.

„Þarna eru dóm­stólar í fyrsta sinn að dæma skaða­bætur fyrir mann sem fékk ekki starf sem hann á ekki rétt á sam­kvæmt lögum,“ sagði hún.

Sigríður tók í sama streng í Kast­ljós­inu. „Það er nýmæli að hér sé verið að dæma mönnum skaða­bætur fyrir að fá ekki starf sem þeir hafa sóst eftir.“ 

Dóms­mála­ráð­herra hefur ítrekað hafnað því að hafa brotið lög í Lands­rétt­ar­mál­inu þrátt fyrir að dóm­stólar hafi kom­ist að gagn­stæðri nið­ur­stöðu.

Þegar van­traust­s­til­laga gegn Sigríði var til umræðu á Alþingi þann 6. mars síð­ast­lið­inn sagð­ist hún hafa fylgt lögum í einu og öllu þegar hún skip­aði dóm­ara við Lands­rétt í fyrra.

Bæði Hér­aðs­dómur Reykja­víkur og Hæsti­réttur hafa þó kom­ist að þeirri nið­ur­stöðu að ráð­herra hafi brotið lög, 10. gr. stjórn­sýslu­laga, þegar hún skip­aði dóm­ara við Lands­rétt. Í þessu fólst að ráð­herra sýndi ekki fram á – með full­nægj­andi rann­sókn og rök­stuðn­ingi í sam­ræmi við þær kröfur sem á henni hvíla sam­kvæmt stjórn­sýslu­lögum – að hún hefði skipað hæf­ustu umsækj­end­urna til starfans. Fyrir vikið hafa umsækj­endum sem gengið var fram­hjá verið dæmdar bætur.