Afskriftir fjölskyldufyrirtækja sem Bjarni tók þátt í að stýra eru 130 milljarðar

Afskrift­irnar hjá fjár­fest­ing­ar­fé­lögum sem Glitn­is­skjölin sýna að Bjarni Bene­dikts­son stýrði eða kom að því að stýra fyrir hönd fjöl­skyldu sinnar nema nú tæp­lega 130 millj­örðum króna. Flest fyr­ir­tækj­anna sem til­heyrðu fjöl­skyld­unni urðu gjald­þrota eða voru yfir­tekin af kröfu­höfum í kjöl­far hruns­ins. Mik­il­væg­asta félagið sem fjöl­skyldan hélt eftir er rútu­fyr­ir­tækið Kynn­is­ferðir sem var keypt út úr N1 á meðan fjöl­skyldan stýrði enn olíu­fé­lag­inu og áður en kröfu­hafar þess yfir­tóku fyr­ir­tækið. 

Eitt það mark­verð­asta sem Glitn­is­skjölin opin­bera er hversu hversu virkan þátt Bjarni Bene­dikts­son tók í að stýra fjár­fest­ing­ar­fé­lögum fjöl­skyldu sinnar sem Glitnir fjár­magn­aði að lang­mestu leyti – helsta und­an­tekn­ingin er fjár­mögnun Kaup­þings á Umtaki, fast­eigna­fé­lagi N1, sem var með lán upp á 130 millj­ónir evra þar, eða vel á annan tug millj­arða á sínum tíma. 

Bjarni var auk þess stjórn­ar­maður í mörgum af þessum félögum, meðal ann­ars BNT, N1 og Fjár­fest­ing­ar­fé­lag­inu Mætti ehf. Tvö fyrr­nefndu félögin eru löngu orðin gjald­þrota og N1 var yfir­tekið af kröfu­höfum félags­ins eftir hrunið 2008. 

Þær afskriftir sem fyrir liggja hjá þessum fyr­ir­tækjum nema tæp­lega 82 millj­örðum króna. Við þessa tölu er eðli­legt að bæta skuldum eign­ar­halds­fé­lags­ins Földungs ehf., áður Vafnings ehf., við þrotabú Glitnis en þær nema ríf­lega 47 millj­örðum króna. Ástæðan er sú að Föld­ungur ehf. á nær engar eignir á móti þessum skuldum, ein­ungis 52 millj­ónir króna sam­kvæmt árs­reikn­ingi árs­ins 2017 og liggur því fyrir að þessar kröfur verða afskrif­aðar með tíð og tíma.