Bróðir Hauks handtekinn fyrir að flagga tyrkneska fánanum á Stjórnarráðshúsinu

Fáni Tyrk­lands var dreg­inn að húni á Stjórn­ar­ráðs­bygg­ing­unni á tólfta tím­anum í dag. Að verki var Darri Hilm­ars­son, bróðir Hauks Hilm­ars­sonar sem er saknað eftir að Tyrkir réð­ust inn í Afrin-hérað í Sýrlandi fyrr á þessu ári. Hafði Haukur tekið þátt í bar­áttu gegn Íslamska rík­inu.

Íslensk yfir­völd hafa verið gagn­rýnd fyrir lin­kind og með­virkni gagn­vart Tyrk­lands­stjórn, en Tyrk­lands er banda­lags­ríki Íslands innan NATO auk þess sem Rétt­lætis- og fram­fara­flokkur Recep Tayyip Erdoğan Tyrk­lands­for­seta er syst­ur­flokkur Sjálf­stæð­is­flokks­ins í Evr­ópu­sam­tökum íhalds- og umbóta­sinna.

Fjöldi þjóð­þekktra Íslend­inga sendi Katríni Jak­obs­dóttur for­sæt­is­ráð­herra opið bréf þann 23. apríl síð­ast­lið­inn, kall­aði eftir metn­að­ar­fyllri aðgerðum og gerði athuga­semdir við að svo virt­ist sem rann­sókn utan­rík­is­ráðu­neyt­is­ins á hvarfi Hauks hefði verið fram­kvæmd „með sem minnstri fyr­ir­höfn og með það fyrir augum að styggja ekki tyrk­nesk yfir­völd – þau sömu og talin eru hafa sært, hand­samað eða jafn­vel myrt Hauk“.

„Að sögn íslenskra stjórn­valda hafa Tyrkir neitað því að þeir séu með líkið. Utan­rík­is­ráðu­neytið hefur synjað beiðni okkar um að spyrja fjöl­miðl­ana út í heim­il­i­dir fyrir þessum fréttum, þau treysta bara tyrk­neskum stjórn­völdum,“ skrif­aði Eva Hauks­dóttir, móðir Hauks, nýlega. „Bæði Katrín Jak­obs­dóttir og Guð­laugur Þór hafa hundsað ábend­ingar okkar um að senni­lega hafi Tyrkir van­rækt þá skyldu sína að hirða lík og lík­ams­leifar af svæð­inu og um sví­virði­lega með­ferð Tyrkja á líkum and­stæð­inga sinna.“ 

Mynd: Benjamín Julian

„Haukur Hilm­ars­son týnd­ist í árás Tyrk­lands­hers á sýr­lenska Kúr­distan. Íslenska ríkið, undir veiklu­legri leið­sögn Katrínar Jak­obs­dóttur, hefur ekki viljað styggja Tyrki með því að spyrj­ast um of um hvað þeir gerðu við hann,“ skrifar Benjamín Julian, vinur Hauks á Facebook. „Darri Hilm­ars­son, bróðir Hauks, klifraði af því til­efni áðan upp á þak stjórn­ar­ráðs­ins og dró fána Tyrk­lands að húni – enda stjórn­ar­ráðið greini­lega ekki meira full­valda en svo að það buktar sig fyrir valda­trylltum alræð­is­sinnum. Sér­sveitin tók Darra niður af þak­inu, en ekki fyrr en hún hafði dansað kringum hann til að skipta aftur yfir í íslenskan fána, enda skipta manns­líf þess­arar fjöl­skyldu yfir­völd minna máli en til­gerð­ar­sjálf­ræði og tákna­dýrkun.“

Mynd: Benjamín Julian

Haukur Hilm­ars­son er einna frægastur fyrir póli­tískan gjörn­ing sem hann fram­kvæmdi í kjöl­far banka­hruns­ins 2008, þar sem hann flagg­aði Bón­us­fána á þing­hús­inu til að vekja athygli á sam­krulli stjórn­mála og við­skipta­lífs. Nú, tíu árum síðar, lagði bróðir Hauks leið sína upp á Stjórn­ar­ráðs­húsið og dró tyrk­neska fán­ann að húni til að mót­mæla því sem aðstand­endur Hauks upp­lifa sem með­virkni íslenskra stjórn­valda gagn­vart Tyrk­lands­stjórn.

Lög­reglan var fljót á vett­vang, fór upp á þakið og tók Darra höndum. „Maðurinn, sem var hand­tek­inn mót­þróa­laust, var færður á lög­reglu­stöð og bíður nú yfir­heyrslu,“ segir í frétta­til­kynn­ingu frá lög­regl­unni um málið.