Engar merk­ingar eru innan Leifs­stöðvar sem benda komu­far­þegum á almenn­ings­sam­göngur. For­svars­menn Strætó hafa óskað eftir því við Isavia að ferða­mönnum sé bent á vagn­ana til jafns við rútur og leigu­bíla. Þeim hafi verið lofað bættum merk­ingum utandyra síð­asta sumar, en við það hafi ekki verið staðið. Upp­lýs­inga­full­trúi Isavia segir að það standi til á næstu mán­uðum.

„Þetta er eini flug­völlur Evrópu sem ég veit um þar sem er ekki bent á almenn­ings­sam­göngur,“ segir Guð­mundur Heiðar Helgason, mark­aðs- og upp­lýs­inga­full­trúi Strætó. „Ef þú ferð á London Heathrow er bent á neð­an­jarð­ar­lest­ina og stræt­is­vagna, þó að það séu leigu­bílar og annað í boði líka. Það að opin­bert fyr­ir­tæki eins og Isavia sé að standa í vegi fyrir að almenn­ings­sam­göngur séu aug­lýstar finnst mér furðu­legt.“

Þurfa að ganga 200 metra til að finna Strætó

Til að finna Strætó þurfa komu­far­þegar að labba 200 metra fram hjá skamm­tíma­stæð­unum fyrir utan flug­stöð­ina. Í júní síð­ast­liðnum fékk Strætó upp­lýs­ingar frá Isavia um að til stæði að bæta við fjórum skiltum utandyra þar sem bent er á almenn­ings­sam­göngur. Við það hafi ekki verið staðið, þrátt fyrir ítrek­aðar beiðnir. „Það er ekk­ert skýli, bara staur, en ekk­ert merkt ann­ars,“ segir Guð­mundur. „Okkur lang­aði að hafa skilti þar sem er bent á almenn­ings­sam­göngur, en fannst eins og þau settu okkur undir sama hatt og rútu­fyr­ir­tæki.“

Að sögn Guðjóns Helga­sonar, upp­lýs­inga­full­trúa Isavia, ætlar fyr­ir­tækið sér að upp­fylla þetta lof­orð. „Til stendur að upp­færa merk­inga­kerfi fyrir utan flug­stöð­ina nú á fyrstu mán­uðum þessa árs svo að far­þegar eigi auð­veld­ara með að rata að þeim sam­göngu­lið sem þeir hygg­ist nýta sér,“ segir Guðjón. „Merk­ingar verða áfram bæði á ensku og íslensku.“

Guðjón segir jafn­framt að til standi að færa stoppi­stöð Strætó til, en ekki hvort hún verður nær eða fjær flug­stöð­inni eða hvort aðstaða verði bætt með ein­hverjum hætti. Sem stendur er ekki skýli við stoppi­stöð­ina. Engin svör feng­ust um hvort Strætó yrði bætt inn á skiltin inn­an­húss.

RúturIsavia hefur lagt umdeilt gjald á rútur og vísar lítið á ódýr­ari kost­inn, Strætó.

Mynd: Shutterstock

Ódýrasti kosturinn til Reykjavíkur

Á íslenska vef Kefla­vík­ur­flug­vallar er sér­stakur flipi þar sem upp­lýs­ingar um ferðir Strætó er að finna. Á enska vefnum hins vegar er Strætó flokk­aður með einka­reknu rútu­fyr­ir­tækj­unum Gray Line og Flybus undir flip­anum „Buses“. Bæði rútu­fyr­ir­tækin hafa greitt gjald fyrir stæði upp við flug­stöð­ina.

Leið 55 hjá Strætó gengur frá Leifs­stöð til mið­borgar Reykja­víkur níu sinnum á dag og kostar mið­inn 1.840 kr. Til sam­an­burðar kostar slík ferð 2.700 kr. með Flybus, en ferðir eru tíð­ari og ferða­tím­inn styttri. Ætli far­þegi frá Leifs­stöð til eins af sveit­ar­fé­lög­unum á Suð­ur­nesjum kostar ferðin þó aðeins 460 kr.