Donald Trump Bandaríkjaforseti bryddaði upp á því í símtali við Bjarna Benediktsson, þáverandi forsætisráðherra, í nóvember 2024 hvort Ísland ætti að verða 51. ríki Bandaríkjanna. RÚV greinir frá þessu í dag. Heimildin hefur rætt við einstakling innan stjórnkerfisins sem staðfestir efni símtalsins.

Símtalið átti sér stað 26. nóvember 2024, fjórum dögum fyrir alþingiskosningar. Trump hafði þá skömmu áður verið kjörinn forseti Bandaríkjanna á ný en hafði ekki tekið við embætti.

RÚV hefur eftir nokkrum heimildarmönnum, sem séð hafa minnisblað um samtalið, að Trump hafi snemma í símtalinu rætt áhuga vina og vandamanna sinna á Íslandi. Hann hafi síðan sagt, í gamansömum tón, að stundum hefði verið rætt um að Ísland yrði 51. ríki Bandaríkjanna.

Bjarni hafi gefið lítið fyrir hugmyndina og tekið henni sem léttu gríni. Trump hafi hins vegar gripið fram í og hvatt Bjarna til að hugsa málið vel að loknum kosningasigri, samkvæmt frásögn RÚV.

Símtalið fór ekki fram eftir hefðbundnum opinberum boðleiðum og hvorki er til upptaka né formlegt endurrit af því. Alþjóðafulltrúi forsætisráðuneytisins hlustaði hins vegar á samtalið og skrifaði minnispunkta, samkvæmt upplýsingum bæði RÚV og Heimildarinnar.

Í opinberri tilkynningu forsætisráðuneytisins daginn eftir símtalið var ekki minnst á ummæli Trumps um Ísland sem mögulegt ríki Bandaríkjanna. Þar sagði þess í stað að Trump hefði sýnt Íslandi mikinn áhuga, meðal annars sem ferðamannastað, og verið áhugasamur um sögu og menningu þjóðarinnar.

RÚV óskaði eftir minnisblaðinu frá forsætis- og utanríkisráðuneytunum en afhendingu þess var hafnað. Utanríkisráðuneytið sagði birtingu þess geta skaðað trúnaðarsamband Íslands við erlent ríki og þar með hagsmuni íslenska ríkisins.

Frásögnin kemur fram nokkrum dögum eftir að Trump birti mynd á samfélagsmiðli sínum þar sem meðal annars Ísland og Grænland voru sýnd undir bandaríska fánanum. Þorgerður Katrín Gunnarsdóttir utanríkisráðherra kallaði sendiherra Bandaríkjanna á Íslandi á fund í kjölfarið og sagði færsluna óviðeigandi.

Trump hefur áður viðrað hugmyndir um yfirráð Bandaríkjanna yfir öðrum landsvæðum. Hann hefur ítrekað rætt um Grænland og einnig sagt að Kanada gæti orðið 51. ríki Bandaríkjanna. Hann hefur birt kort af löndunum þar sem þau eru þakin bandaríska fánanum. Það sama hefur hann gert með Venesúela, en í ársbyrjun lét Trump ráðast inn í landið og ræna forseta landsins, í því skyni meðal annars að ná forræði yfir olíuauðlindum landsins.