Donald Trump Bandaríkjaforseti skipaði í dag hliðhollan bandamann sinn, án nokkurrar reynslu af þjóðaröryggismálum, yfirmann leyniþjónustu Bandaríkjanna – og sagði að hann myndi einnig halda áfram í núverandi störfum sínum við að hafa umsjón með húsnæðis- og húsnæðislánastefnu alríkisins.

Bill Pulte, yfirmaður Húsnæðisfjármögnunarstofnunar alríkisins (Federal Housing Finance Agency), sem er þekktur fyrir að ráðast opinberlega á pólitíska andstæðinga Trumps, var útnefndur starfandi yfirmaður leyniþjónustumála (DNI) og tekur við af Tulsi Gabbard.

Gabbard, sem sjálf var umdeild í starfi, sagði af sér seint í maí og lauk þar með starfstíma þar sem hún virtist vera á öndverðum meiði við Trump vegna stríðs hans gegn Íran.

Leyniþjónustusamfélag bandaríska alríkisins heyrir undir yfirmann leyniþjónustumála og er hann um leið aðalráðgjafi forsetans í málaflokknum. Hann þarf samkvæmt lögum að hafa „víðtæka sérfræðiþekkingu á þjóðaröryggismálum“, sem Pulte skortir.

Trump hrósaði Pulte í færslu á samfélagsmiðlum þar sem hann tilkynnti um skipunina og sagði að hann „hefði mikla reynslu af því að stjórna viðkvæmustu málum Bandaríkjanna, öryggi og heilbrigði markaðanna“.

Forsetinn bætti við að Pulte, sem einnig stýrir húsnæðislánarisunum Fannie Mae og Freddie Mac, muni halda áfram að gegna störfum sínum tengdum húsnæðismálum.

Pulte, sem er 38 ára, hefur verið lýst af sumum bandarískum fjölmiðlum sem „árásarhundi“ forsetans.

Pulte hefur sakað öldungadeildarþingmann demókrata, Adam Schiff, og dómsmálaráðherra New York, Letitiu James, um að falsa skjöl vegna húsnæðislánaumsókna.

The Wall Street Journal greindi frá því að samkvæmt innri kvörtun hjá Fannie Mae hafi Pulte ólöglega nálgast húsnæðislánaskrár James og annarra embættismanna demókrata.

Kviðdómur alríkisins ákærði Letitiu James í október en málinu var vísað frá, þó með möguleika á að leggja það fram aftur.

Óttast pólitískar ofsóknir

Pulte hefur einnig barist fyrir svikamáli tengdu húsnæðislánum gegn Lisu Cook, seðlabankastjóra Bandaríkjanna, en á grundvelli þess reyndi Trump að reka hana. Það mál bíður meðferðar Hæstaréttar.

Pulte, sem er erfingi byggingarfyrirtækis, hefur valdið klofningi meðal margra, jafnvel innan innsta hrings Trumps, með ágengum og opinberum pólitískum aðgerðum sínum.

Bandarískir þingmenn demókrata gagnrýndu skort Pulte á reynslu og sögu hans um að beina spjótum sínum að andstæðingum Trumps.

Mark Warner, varaformaður leyniþjónustunefndar öldungadeildarinnar, sagði að Pulte virðist hafa verið valinn „vegna þess að Hvíta húsið telur að hann muni skila þeirri frásögn sem það vill, en ekki þeim upplýsingum sem við þurfum“.

„Forsetinn hefur valið embættismann sem hefur sýnt ekki aðeins vilja heldur ákafa til að beita valdi stjórnvalda til að stunda pólitískar hefndaraðgerðir,“ sagði Warner í yfirlýsingu.

Og leiðtogi demókrata, Chuck Schumer, sagði í ræðustól öldungadeildarinnar að einhverjum sem myndi leggja fram „tilefnislausar, pólitískar og hneykslanlegar ákærur gegn pólitískum embættismönnum sem honum líkar ekki við, sé ekki treystandi til að vernda þjóðaröryggi okkar“.

Varaforsetinn JD Vance kom Pulte hins vegar til varnar og lýsti honum í færslu á samfélagsmiðlum sem „frábærum náunga sem gerir sér grein fyrir því að skrifræði leyniþjónustusamfélagsins verður að lúta hinni kjörnu forystu (frekar en öfugt)“.

Rak regluverði

Hjá Fannie Mae hefur Pulte rekið innri regluverði sem voru að rannsaka bandamenn hans og lýst þeim aðgerðum sem leið til að binda enda á stefnu um fjölbreytni, jöfnuð og inngildingu (DEI) – sem Trump hefur reynt að útrýma úr bandarískri stjórnsýslu.

Í húsnæðisfjármögnunarmálum hefur hann barist fyrir innleiðingu 50 ára húsnæðislána í Bandaríkjunum, en tillagan hefur reitt marga í MAGA-hreyfingunni til reiði.

Pulte hefur lent í deilum við fjölskyldu sína um framtíð PulteGroup-fyrirtækis þeirra og yfirgaf stjórn þess árið 2020.

Bandarískir fjölmiðlar greina frá því að hann hafi einnig lent í deilum við fólk í innsta hring Trumps.

Árið 2025 hótaði fjármálaráðherrann Scott Bessent að kýla Pulte í kvöldverði á einkaklúbbi, að sögn Wall Street Journal og Politico.