„Kemur að því að það er ekki lengur lýðræði“

Úkraína ætti að halda kosn­ingar, sagði Donald Trump í við­tali sem birt var í dag, og dró í efa hvort landið væri raun­veru­lega lýð­ræð­is­ríki, um leið og hann ítrek­aði harða gagn­rýni sína á úkra­ínska leið­tog­ann.

Í sam­tali við Politico sak­aði Banda­ríkja­for­seti stjórn­völd í Kyiv um að „nota stríðið“ til að forð­ast kosn­ingar sem hefur verið frestað vegna setn­ingar her­laga frá inn­rás Rússa í Úkraínu í febr­úar 2022.

„Ég tel að það sé mik­il­vægur tími til að halda kosn­ingar. Þeir nota stríðið til að halda ekki kosn­ingar, en ég myndi halda að úkra­ínska þjóðin ætti ... ætti að hafa það val,“ sagði Trump.

„Þú veist, þeir tala um lýð­ræði, en það kemur að því að það er ekki lengur lýð­ræði.“

Án her­laga hefðu for­seta­kosn­ingar í Úkraínu átt að fara fram í mars 2024.

Trump ítrek­aði gagn­rýni sína á Volody­myr Zelenskyj frá því á sunnu­dag og hélt því fram að úkra­ínski for­set­inn hefði ekki lesið áætlun Banda­ríkj­anna um að binda enda á stríðið.

Samn­inga­við­ræðum milli banda­rískra og úkra­ínskra emb­ætt­is­manna, þar á meðal Zelensky, lauk á laug­ar­dag án sýni­legs árang­urs, þótt Zelensky hafi skuld­bundið sig til að halda áfram við­ræðum í átt að „raun­veru­legum friði“.

„Kannski hefur hann lesið hana í nótt. Það væri gott ef hann myndi lesa hana. Þú veist, margir eru að deyja,“ sagði Trump.

Banda­ríkja­for­seti full­yrti að Rússland hefði „yfir­hönd­ina“ í átök­unum vegna þess að það væri „miklu stærra“.

Þegar hann var spurður hvort hann teldi að Úkraína hefði tapað stríð­inu svar­aði Trump: „Jæja, þeir hafa misst land­svæði löngu áður en ég kom hingað,“ og bætti við að tap þeirra hefði haldið áfram síð­ustu 10 mán­uði.

Ummæli hans komu á sama tíma og evr­ópskir banda­menn Úkraínu lýstu yfir sam­stöðu með Úkraínu í London á mánu­dag, þar sem Zelenskyj hélt því fram að Úkraína hefði „engan rétt“ til að láta af hendi til Rúss­lands þau land­svæði sem Moskva gerir til­kall til.

Að sögn Trumps er „hluti af vanda­mál­inu“ sá að Zelenskyj og rúss­neskur starfs­bróðir hans, Vladimír Pútín, „hata hvorn annan í raun og veru“ og því sé „mjög erfitt fyrir þá að reyna að gera samn­ing“.

Trump gagn­rýndi einnig hlut­verk Evrópu í til­raunum til að binda enda á stríðið.

„Evrópa stendur sig ekki vel á margan hátt,“ sagði hann.

„Þeir tala en þeir fram­kvæma ekki. Og stríðið heldur bara áfram og áfram. Ég meina, það hefur staðið yfir í fjögur ár núna, löngu áður en ég kom hingað,“ sagði Trump, sem boð­aði í kosn­inga­bar­áttu sinni í fyrra að hann myndi ljúka stríð­inu á fyrsta degi.