Fram­bjóð­andi stjórn­ar­flokks­ins í for­seta­kosn­ing­unum í Hondúras sem fara fram á morgun sak­aði Donald Trump, for­seta Banda­ríkj­anna, um „afskipta­semi“ eftir að hann lýsti yfir stuðn­ingi við hægri­s­inn­aðan mót­fram­bjóð­anda hennar og sagð­ist ætla að náða fyrr­ver­andi for­seta.

„Það leikur eng­inn vafi á því að þetta eru tvær áþreif­an­legar aðgerðir, þremur dögum fyrir kosn­ingar, sem eru full­kom­lega afskipta­samar,“ sagði Rixi Moncada, fram­bjóð­andi vinstri­flokks­ins Libre, flokks sitj­andi for­seta Xiomara Castro, á blaða­manna­fundi á laug­ar­dag.

Rixi MoncadaFor­seta­fram­bjóð­andi til vinstri kvartar undan afskiptum Banda­ríkja­for­seta af kosn­ingum.

Mynd: Erica Bechard

Trump lýsti á mið­viku­dag yfir stuðn­ingi við hægrifram­bjóð­and­ann Nasry Asfura, einn af þremur sig­ur­strang­leg­ustu fram­bjóð­end­unum í kapp­hlaup­inu, og sagði að þeir tveir gætu unnið saman gegn „fíkni­efna­komm­ún­istum“ svæð­is­ins.

Í gær gekk hann svo lengra, hót­aði að skera niður stuðn­ing Banda­ríkj­anna ef fram­bjóð­andi hans tap­aði – og til­kynnti óvænt að hann myndi náða fyrr­ver­andi for­set­ann Juan Orlando Hernandez, sem um leið hefur vakið upp spurn­ingar um stríð hans gegn fíkni­efnum.

Fyrr­ver­andi leið­togi Hondúras, úr sama flokki og Asfura, afplánar 45 ára fang­els­is­dóm í Banda­ríkj­unum eftir að hafa verið sak­felldur í fyrra fyrir fíkni­efna­smygl.

Hernandez, sem stýrði Mið-Amer­íku­rík­inu frá 2014 til 2022, var sak­aður af banda­rískum sak­sóknurum um að hafa greitt fyrir inn­flutn­ingi á um 400 tonnum af kóka­íni til Banda­ríkj­anna.

Hann var fram­seldur til Banda­ríkj­anna aðeins nokkrum vikum eftir að hann lét af emb­ætti.

Ákvörðun Trumps um að náða Hernandez var harð­lega gagn­rýnd af póli­tískum and­stæð­ingum hans í Banda­ríkj­unum og jafn­vel for­seta Kólumbíu, þar sem hún kemur þvert ofan í umdeildar hern­að­ar­að­gerðir Banda­ríkj­anna gegn fíkni­efna­smygli í Rómönsku Ameríku og yfir­stand­andi til­raunum og hót­unum gegn for­seta Venes­ú­ela á grund­velli ásak­ana um aðild að fíkni­efna­smygli.

Í her­ferð Trumps hafa yfir 80 manns verið drepnir í árásum á alþjóð­legu haf­svæði, sem sér­fræð­ingar hafa gagn­rýnt sem aftökur án dóms og laga.

Trump sagði í færslu sinni á sam­fé­lags­miðlum í gær að Hernandez „hafi, að sögn margra sem ég ber mikla virð­ingu fyrir, fengið mjög harða og ósann­gjarna með­ferð,“ án þess að útskýra það nánar.

Hann boð­aði síðan í dag að aðgerðir á landi gegn fíkni­efna­smygli hæfust senn og sagði loft­helgi Venes­ú­ela vera lok­aða.