Stjórn Blaðamannafélagsins fordæmir að enn einn blaðamaðurinn, Ingi Freyr Vilhjálmsson, hafi hlotið stöðu sakbornings í Samherjamálinu fyrir það eitt að sinna störfum sínum. Samkvæmt upplýsingum sem Ingi Freyr fékk frá lögreglu er sakarefni hans það eitt að hafa móttekið tölvupóst.
Þetta kemur fram í ályktun sem stjórn samþykkti á fundi sínum. Þar segir enn fremur að stjórnin lýsti miklum áhyggjum af þeirri vegferð sem lögregla virðist vera á þegar talið sé mögulega saknæmt athæfi að taka á móti tölvupóstum, þegar tilfellið sé að slíkt sé kjarni í vinnu hvers blaðamanns, það er að taka á móti upplýsingum, meta trúverðugleika þeirra og fréttagildi fyrir almenning.
Í ályktuninni er ákvörðun Lögreglustjórans á Akureyri, um að veita blaðamönnum stöðu sakborninga í málinu, sögð fáránleg, enda liggi ekki fyrir að þeir hafi gerst sekir um nokkuð saknæmt. „Ennfremur vill Blaðamannafélagið undirstrika að störf og tjáningarfrelsi blaðamanna njóta ríkrar verndar vegna þess sérstaka hlutverks sem fjölmiðlar gegna með tilliti til opinberrar umræðu í lýðræðisríki. Því ber að gjalda varhug við íhlutan lögreglu sem kann að vera túlkuð sem afskipti af störfum blaðamanna við öflun og miðlun frétta um mikilvæg málefni.“
„Að mati félagsins er rannsóknin í heild tilefnislaus með öllu“
Eins og Heimildin greindi frá upplýsti lögregla Inga Frey um að hann hefði haft réttarstöðu sakbornings í um hálft annað ár án þess að hann væri upplýstur um það. Ástæðan hafi verið sú að lögregla taldi Inga Frey vera búsettan erlendis. Í ályktun stjórnar Blaðamannafélagsins er þetta sagt lýsandi fyrir vinnubrögð lögreglunnar á Norðurlandi eystra í málinu.
„Þau hafa einkennst af vanþekkingu en ekki síður vanvirðingu gagnvart grundvallarstörfum blaðamanna og hlutverki þeirra, sem og þeirri auknu vernd sem þeir hljóta samkvæmt lögum starfa sinna vegna. Að mati félagsins er rannsóknin í heild tilefnislaus með öllu. Hún er þó til þess gerð að skapa óvissu um lagalegan rétt blaðamanna og ótta innan stéttarinnar um að hver sem er geti hvenær sem er verið kallaður til yfirheyrslu og hlotið réttarstöðu sakbornings fyrir það eitt að fá sendan tölvupóst.“
Í ofanálag telur Blaðamannafélagið óeðlilegt hversu langan tíma rannsóknin hafi tekið og bendir á að ríkissaksóknari hafi sent lögreglustjóranum á Norðurlandi eystra erindi þar sem óskað er eftir skýringum þar á. „Það er íþyngjandi fyrir alla að hafa réttarstöðu sakbornings, en fyrir blaðamenn er það sömuleiðis mikið inngrip inn í tjáningarfrelsi þeirra og störf. Þeim mun mikilvægari almannahagsmuni þarf þar af leiðandi til að réttlæta slíkt inngrip. Stjórn Blaðamannafélagsins krefst þess að lögreglan ljúki rannsókn sinni án frekari tafa.“
Fyrirvari um hagsmuni: Í fréttinni er fjallað um atburði sem tengjast Heimildinni og starfsmönnum fjölmiðilsins beint.
Ef lögreglan og yfirvöld væru ekki spillt þá væri til innra eftirlit sem væri núna í harðri vinnslu við að taka á ólögmætri vernd vopnasölu og haressment tengdra aðila stórbokka og vel settra möppudýra... óháð því hvort þeir eru vinir eða vandamenn viðkomandi yfirvalda.
OG fimmmenningarnir ættu að hafa í huga ef þeir kunna due diligence að þeir hefðu átt að sjá fyrir að fuzzy lagasetning um verndun þeirra við vinnu sína væri auðvitað þykjustulög.