Fyrri aukaspurning:

Málarinn sem málaði myndina hér að ofan fæddist á þessum degi árið 1867. Hvað hét hann?

***

Aðalspurningar:

1.  Fyrsta konan sem varð rektor Háskóla Íslands fæddist á þessum degi 1954. Hvað heitir hún?

2.  Árið 1940 fæddist á þessum degi kona sem var lengi blaðamaður á Morgunblaðinu, fór síðan að læra arabísku í þrem Arabalöndum, stundaði mjög ferðalög, bæði ein síns liðs en einnig með hópa Íslendinga, og stundaði ýmislegt hjálparstarf með fjáröflun fyrir bágstatt fólk, ekki síst konur og börn. Hún átti einmitt nokkur börn sjálf og hét ... hvað?

3.  Á þessum degi árið 1992 fæddist fótboltamaður sem þykir vel liðtækur og rúmlega það, en vakti þó mesta athygli þegar hann hneig niður eftir hjartaáfall í landsleik fyrir tveim árum og var um tíma ekki hugað líf. Hann hefur þó náð sér að fullu og heitir ... hvað?

4.  Á þessum degi árið 2005 var sett í loftið vefsíða sem náði fljótt miklum vinsældum og hefur haldið þeim síðan. Vefsíðan er nú í öðru sæti yfir mest sóttu vefsíðurnar í veröldinni. Hvaða síða er þetta?

5.  Á þessum degi 1987 var frumsýnd kvikmynd eftir Friðrik Þór Friðriksson um tvo unga menn sem fara á fyllerí í Reykjavík eftir mikla vinnutörn og enda á því að brjótast inn í byssubúð og halda þaðan uppi skothríð við lögreglu. Myndin heitir Skytturnar sem vísar bæði til afhæfis mannanna en líka atvinnu þeirra. Við hvað störfuðu þeir?

6.  Á þessum degi árið 1779 var frægur enskur landkönnuður drepinn í átökum við heimamenn á Havaí-eyjum. Hvað hét landkönnuðurinn?

7.  Á þessum degi 2018 var litríkur forseti Suður-Afríku þvingaður til að segja af sér embætti en hann var orðaður við víðtæka spillingu og ýmislegt í þeim dúr Reyndar hafði hann áður verið bendlaður við margt misjafnt og m.a.s. setið í fangelsi vegna þess. Hvað heitir karl þessi?

8.  Á þessum degi 1949 kom ísraelska þingið saman í fyrsta sinn. Hvað nefndist þetta þing?

9.  Þann 14. febrúar 1989 var rithöfundur dæmdur til dauða af trúarleiðtoga fyrir bók sem höfundurinn hafði skrifað. Hvað heitir bókin?

10.  Á þessum degi 1912 var 48. ríkið formlega tekið upp í Bandaríki Norður-Ameríku, síðasta ríkið í hinu samfellda landflæmi sem yfirleitt eru talin Bandaríkin þótt síðar hafi tvö fjarlægari ríki bæst við. Hvað var þetta 48. ríki?

***

Seinni aukaspurning:

Gríðarlega athygli vakti þegar konan hér að ofan sýndi blaða- og sjónvarpsmönnum heimili sitt 14. febrúar 1962. Hvað hét þessi prúðbúna húsmóðir?

***

Svör við aðalspurningum:

1.  Kristín Ingólfsdóttir.

2.  Jóhanna Kristjónsdóttir.

3.  Christian Eriksen.

4.  Youtube.

5.  Hvalveiðar

6.  Cook.

7.  Zuma.

8.  Knesset.

9.  Söngvar Satans.

10.  Arizona.

***

Svör við aukaspurningum:

Þórarinn B. Þorláksson málaði myndina frá Þingvöllum.

Jacqueline Kennedy fylgdi blaðamönnum um Hvíta húsið í Washington.