Þá er komið að þúsundustu spurningaþrautinni.
Í tilefni dagsins leitaði ég til nokkurra þeirra sem leysa þrautina reglulega í morgunsárið og bað um spurningar frá þeim.
Þeim fylgdu tilmæli um að spurningarnar væru þokkalega þungar og máttu gjarnan tengjast áhugasviði eða vinnu viðkomandi. Og þær fylgja því hér á eftir, og aðalspurningarnar eru raunar ellefu en ekki tíu eins og venjulega.
***
Fyrri aukaspurning kemur frá Jóni Óskari myndlistarmanni sem birtir portrett-mynd eftir sjálfan sig hér að ofan með þessum skilaboðum:
Þetta er mynd af einum snjallasta sniper (leyniskyttu) GGRN flokksins í Counter-Strike um síðustu aldamót. Í dag er hann einn fyrirferðarmesti álitsgjafi internetsins. Hvað heitir hann? Rétt er að vekja athygli á því að myndin heitir Rooster.
***
1. Björn Friðgeir Björnsson spyr:
Hús eitt í Reykjavík hefur lengst af borið nafnið Esjuberg þó það hafi raunar verið betur þekkt vegna starfsemi sem þar var áratugum saman. Húsið var reist 1916 en umrædd starfsemi var í húsinu 1952-2000 þegar húsið var selt og hefur síðan verið heldur vanrækt. En hvaða stofnun hafði aðsetur í húsinu þessi rétt tæpu 50 ár, 1952-2000?
***
2. Elínrós Eiríksdóttir spyr:
Waldorf-stefnan í menntamálum er nokkuð útbreidd. Hvað hét upphafsmaður hennar?
***
3. Hrafn Þorgeirsson spyr:
Í júlí 1956 þjóðnýttu Egyptar alþjóðlegt félag sem sá um rekstur Súesskurðarins. Þrjú ríki sendu þá herlið til Egyptalands til að endurheimta yfirráð vesturveldanna yfir skurðinum og um leið hrekja frá völdum forseta Egyptalands. Stríðinu lauk fljótlega með ósigri Egypta, enda við ofurefli að etja. Hver voru þessi ÞRJÚ ríki?
***
4. Ragnhildur Sverrisdóttir spyr:
Guðmundur J. Guðmundsson, öðru nafni Gvendur Jaki, var ungur verkamaður þegar Einar Jónsson myndhöggvari bað hann að sitja fyrir vegna Kristslíkneskis sem hann var að gera. Þannig voru axlir Jakans, handleggir og hendur meitlaðar í stein. En hvert leitaði Einar hins vegar eftir innblæstri fyrir andlitsfall Kristsmyndinnar?
***
5. Þórunn Hreggviðsdóttir spyr:
Hvað heitir höfuðborg Moldovu?
***
6. Örn Úlfar Sævarsson spyr:
Hvaða vinsæli matur eða hráefni hefur þá sérstöðu að kvenmannsnafnið Inga kemur tvisvar fyrir í heiti matarins?
***
7. Ólafur Stephensen spyr:
Tveir fyrrverandi meðlimir popphljómsveitarinnar góðkunnu The Beatles léku á hljóðfæri á plötu Electric Light Orchestra, Zoom, sem út kom 2001. Nefna þarf báða til að fá stig!
***
8. Silja Aðalsteinsdóttir spyr:
Tveir höfundar hafa skrifað um ævi Gunnars Gunnarssonar rithöfundar. Hverjir eru þeir? — Og svo er sérstakt Skriðuklaustursstig fyrir að vita hver var líka að skrifa slíka ævisögu um Gunnar en lifði ekki að klára hana!
***
9. Hallfríður María Pálsdóttir spyr:
Hvar í líkamanum er svokölluð mandla?
***
10. Sigurjón Vilhjálmsson spyr:
Grænn, gulur og rauður eru ansi algengir litir í fánum Afríkuríkja. Raunar er það svo að einungis tvö ríki í álfunni hafa fána þar sem ENGINN af þessum þrem litum kemur fyrir. Nefnið annan fánann til að fá stig, en ef þið getið bæði fáiði sérstakt fánastig!
***
Og loks er svo hin sérstaka „ellefta spurning“ sem gefur að auki lárviðarstig. Ég fékk hana frá þeim hjónum Ásmundi Helgasyni og Elínu R. Ragnarsdóttur.
Hún er svona:
„Ber er hver að baki nema sér bróður eigi.“ — „Ber er hver á bakinu nema sér bróður eigi.“ — Í hvaða tveimur Íslendingasögum koma þessar nánast samhljóða setningar fyrir?
Og fyrir eitt (!) lárviðarstig: Hver sagði þetta um hvern — í hvorri sögu?
***
Og svo er það seinni aukaspurningin, sem kemur frá Þorfinni Ómarssyni.
Á samsettu myndinni hér að neðan má sjá tvo leikara sem eiga það sameiginlegt að hafa unnið til Óskarsverðlauna fyrir túlkun á einni og sömu persónunni en í tveimur ólíkum myndum og með nokkurra ára millibili. Slíkt hafði aðeins einu sinni gerst áður, að tveir leikarar (karlar eða konur) fengju Óskarsverðlaun fyrir að túlka sömu persónuna, hvor í sinni bíómynd. En hvað heita leikararnir tveir á myndinni hér að neðan, hver var persónan sem þeir léku báðir og í hvaða bíómyndum unnu þeir til verðlauna sinna? Þetta eru sem sé fimm atriði og þau verða ÖLL að vera rétt til að fá eitt stig!
***
Og svörin við aðalspurningum eru:
1. Borgarbókasafnið.
2. Rudolf Steiner.
3. Bretland, Frakkland og Ísrael.
4. Líkklæðið í Tórínó, sem svo er kallað.
5. Chișinău.
6. Kjúklingabringa.
7. George Harrison og Ringo Starr.
8. Jón Yngvi Jóhannesson og Halldór Guðmundsson skrifuðu um ævi Gunnars. — Skriðuklaustursstigið: Sveini Skorra Höskuldssyni auðnaðist ekki að klára sína bók en Jón Yngvi og Halldór notuðu drög hans í sínum skrifum.
9. Í heilanum.
10. Þetta eru fánar Sómalíu og Botsvana.
11. Setningin kemur fyrir í Njálu og Grettissögu. — Kári segir þetta um Björn í Mörk í Njálu, Grettir um Illuga bróðir sinn í Grettissögu.
***
Svar við fyrri aukaspurningu:
Jakob Bjarnar blaðamaður.
Svar við seinni aukaspurningu:
Heath Ledger (The Dark Knight) og Joaquin Phoenix (Joker) fengu báðir Óskar fyrir að leika Jókerinn.
***
Spurningaþrautin
Fyrri grein
999. spurningaþraut: Og á morgun birtist þúsundasta þrautin, ef guð lofar
Næsta grein
Athugasemdir