CNN, Fox News og The New York Times hafa lýst Joe Biden, frambjóðanda Demókrata, sigurvegara forsetakosninganna í Bandaríkjunum á þriðjudag. Hefur hann verið lýstur sigurvegari í Pennsylvaníu, en það tryggir honum nægan fjölda kjörmanna til að sigra. Kamala Harris verður fyrsta konan til að gegna embætti varaforseta.
Talið hefur verið áfram upp úr kjörkössum undanfarna daga og sýndu niðurstöður úr Georgíu og Pennsylvaníu að Biden hefði forskot í þeim ríkjum þegar atkvæði úr póstkosningu voru talin. Með sigri í Pennsylvaníu í dag er orðið ómögulegt fyrir Trump að vinna nógu mörg ríki til að fá nógu marga kjörmenn til þess að tryggja sér sigur.
Þó hefur verið staðfest að endurtalið verði í Georgíu þar eð munurinn á milli frambjóðendanna tveggja er mjög mjór. Ekki þarf þó að búast við að það breyti neinu um niðurstöður kosninganna. Á landsvísu hefur Biden fengið yfir 4 milljónum fleiri atkvæði en Trump, en úrslitin velta engu að síður á fjölda kjörmanna.
Joe Biden fæddist í Scranton í Pennsylvaníu og settist fyrst á bandaríska þingið árið 1973 í öldungardeild þess fyrir ríkið Delaware. Hann bauð sig fyrst fram til forseta árið 1988, en náði ekki árangri í forkosningum Demókrata. Árið 2008 varð hann varaforseti Bandaríkjanna þegar Barack Obama var kjörinn forseti. Gegndi hann því embætti í átta ár. Hann verður 78 ára gamall þegar hann tekur við embættinu.
Kamala Harris, varaforsetaefni hans, verður fyrsta konan til að gegna embætti varaforseta í sögu Bandaríkjanna. Engin kona hefur verið forseti landsins. Hún var einnig fyrsta svarta konan til að hljóta slíka tilnefningu fyrir annan af stóru flokkunum tveimur og fyrsta konan af asískum uppruna, en móðir hennar fæddist á Indlandi. Hún settist fyrst í öldungardeildina fyrir fjórum árum fyrir hönd Kaliforníu, en áður starfaði hún sem saksóknari í sama ríki.
Ekki líklegt að Trump viðurkenni ósigur
Trump, fjölskylda hans og starfsfólk, hafa hins vegar gefið til kynna að forsetinn muni ekki viðurkenna sigur Biden. Lögmaður framboðs Trump, Matt Morgan, telur að margt hafi farið úrskeiðis í Pennsylvaníu og Nevada. „Loks lítur út fyrir að forsetinn muni vinna í Arizona, þrátt fyrir óábyrga og ranga yfirlýsingu Fox News og Associated Press um að Biden hafi unnið þar,“ bætti hann við.
Forsetinn sjálfur sagði í færslu í dag að hann væri sigurvegari kosninganna með yfirburðum. Talningin staðfestir hins vegar hið gagnstæða.
Donald Trump Jr., sonur forsetans, segir á Twitter að enginn hafi trú á því að Biden hafi fengið fleiri atkvæði en Obama fékk árið 2008. Í öðrum færslum segir hann kosningasvik hafa átt sér stað og að faðir sinn ætti að berjast áfram um embættið þar til 20. janúar á næsta ári þegar Biden á formlega að taka við því.
Forsetinn fráfarandi hefur ýmsar leiðir til að hafa áhrif á ferlið næstu mánuðina. Hann hefur nú þegar kært kosningarnar í nokkrum lykilríkjum og eygir að endanleg ákvörðun endi hjá hæstarétti Bandaríkjanna. Á dögunum valdi hann nýjan dómara við réttinn, Amy Coney Barrett, en hún þykir íhaldssöm og nýtur stuðnings Repúblikanaflokks forsetans.
Gæti komið til kasta þingsins
Þá munu kjörmennirnir svokölluðu koma saman til að kjósa nýjan forseta formlega 14. desember og geta Repúblikanar reynt að hafa áhrif á það í ríkjum sem þeir stjórna hvaða kjörmenn verða sendir. Eru þeir ekki bundnir til að kjósa samkvæmt niðurstöðum kosninganna og hefur það gerst áður að þeir hlaupist undan merkjum. Gæti það því komið í hlut Mike Pence, varaforseta Trump, að greiða úr hvaða atkvæði kjörmanna teljast gild.
„Fullkomlega fær um að fylgja boðflennum út úr Hvíta húsinu“
Njóti Biden ekki stuðnings 270 kjörmanna, eins og niðurstöður kosninganna segja til um, gæti það komið í hönd fulltrúadeildar Bandaríkjaþings að velja nýjan forseta. Þrátt fyrir að Demókratar séu þar í meirihluta dugar Biden það ekki þar sem hvert ríki Bandaríkjanna fær eitt atkvæði. Eru Repúblikanar í meirihluta þingmanna í 27 ríkjum af 50, þrátt fyrir að vera í minnihluta í heildina. Enn er því möguleiki fyrir Trump að þvinga fram áframhaldandi setu í embætti, þvert á niðurstöður kosninganna.
Kosningateymi Biden hefur hins vegar áður lýst því yfir að bandarísk stjórnvöld séu „fullkomlega fær um að fylgja boðflennum út úr Hvíta húsinu“.
Forsetakosningar í BNA 2020
Stórskuldugur, landflótta og lögsóttur: Það sem gæti beðið Trumps eftir valdaskiptin
Biden kominn yfir í Georgíu
Ástandið í Bandaríkjunum: Óttast reiða Repúblikana sem mótmæla með byssur
Biden nálægt sigri
Sigur Trumps hilling?
Athugasemdir