Eyþór Arnalds, oddviti Sjálfstæðisflokksins í Reykjavík, gagnrýnir að Reykjavíkurborg auglýsi laus störf og að skattfé sé ekki varið í innlenda fréttamiðla. Eyþór er einn af stærstu hluthöfum Morgunblaðsins, en hann á í því 13,41 prósenta hlut í gegnum félag sitt.
Eyþór birti skjáskot af bandarísku fréttaveitunni CNN á Facebook síðu sinni í gær. Á því sést auglýsing frá skóla- og frístundasviði Reykjavíkurborgar vegna lausra starfa.
„Á sama tíma og fyrirtækin í borginni þurfa að segja upp fjölda starfsmanna er borgin sjálf að auglýsa eftir starfsmönnum,“ skrifar Eyþór. „Það vekur ekki síður athygli að verið er að kaupa auglýsingarnar meðal annars til birtingar á erlendri fréttaveitu. Hefði ekki verið nær að verja skattfénu í innlenda fréttamiðla? Fjárfestum innanlands. Verjum störfin.“
Auglýsingin er hins vegar svokölluð Google Ad, form auglýsingar sem hægt er að kaupa hjá tæknifyrirtækinu Google. Kaupandi velur það landsvæði sem auglýsingin birtist á, sem í þessu tilviki hefur líklega verið Ísland eða höfuðborgarsvæðið, og sjá internetnotendur á svæðinu auglýsinguna á ýmsum síðum þegar þeir vafra um netið.
Auglýsingin er þannig ekki keypt til birtingar á CNN heldur fellur Eyþór inn í þann markhóp áhorfenda sem stjórnsýsla Reykjavíkurborgar valdi til að sjá auglýsinguna. Auglýsingar Google Ads birtast ekki í miðlum á íslensku.
Þau störf sem skóla- og frístundasvið auglýsir um þessar mundir samkvæmt vef Reykjavíkurborgar eru störf kennara, stuðningsfulltrúa, frístundaleiðbeinenda og skólaliða.
Líf Magneudóttir, borgarfulltrúi Vinstri grænna, gerir gys að færslu Eyþórs á Twitter. „Eyþór þarf að kynna sér hvernig Google auglýsingar virka,“ svarar notandinn @jonr.
Athugasemdir