Í lok síðasta mánaðar voru 6.279 manns atvinnulausir á Íslandi. Það eru 2.883 færri en voru skráðir á atvinnuleysisskrá í febrúar 2020, í síðasta mánuðinum áður en kórónuveirufaraldurinn skall á. Hlutfallslega var atvinnuleysið þá fimm prósent en er í dag 3,2 prósent. Á meðan að á kórónuveirufaraldrinum stóð mældist atvinnuleysið mest í janúar 2021, 11,6 prósent, og heildaratvinnuleysi að meðtöldum þeim sem enn voru á hlutabótum í þeim mánuði var 12,8 prósent.
Það þýddi að alls 26.403 voru annað hvort atvinnulausir að öllu leyti eða í minnkuðu starfshlutfalli á þeim tíma, eða rúmlega 20 þúsund fleiri en um síðustu mánaðamót.
Atvinnuleysið hefur því, samandregið, skroppið gríðarlega saman á síðustu mánuðum samhliða því að takmörkunum sem settar voru á vegna kórónuveirufaraldursins var aflétt. Hlutfallslega hefur það ekki verið lægra síðan í apríl 2019.
Fjöldi langtímaatvinnulausra mun meiri
Það segir þó ekki alla söguna. Í síðustu mánaðaskýrslu Vinnumálastofnunar kemur fram að 2.387 manns hefðu verið atvinnulausir í meira en tólf mánuði í lok júlí. Það eru mun fleiri en glímdu við slíkt atvinnuleysi fyrir faraldurinn. Í febrúar 2020, þegar atvinnuleysi var hlutfallslega meira en það er núna, höfðu 1.893 verið án atvinnu í ár eða lengur.
[adspot]Fjöldi langtímaatvinnulausra er því 26 prósent meiri nú en hann var þá, í minna atvinnuleysi. Í febrúar 2020, þegar atvinnulífið var enn að glíma við afleiðingar af gjaldþroti WOW air og loðnubrest, voru 21 prósent allra atvinnulausra flokkaðir langtímaatvinnulausir en nú er það hlutfall 38 prósent.
Svipuð staða hjá erlendum ríkisborgurum
Atvinnuleysi hjá erlendum ríkisborgurum nú er á svipuðum stað og fyrir faraldurinn ef horft er á það hlutfallslega. Um síðustu mánaðamót mældist það 7,3 prósent hjá erlendum atvinnuleitendum á sama tíma og atvinnuleysi heilt yfir mældist, líkt og áður sagði, 3,2 prósent. Það þýðir að 2.842 erlendir atvinnuleitendur voru án atvinnu í lok júlí, sem gerir þá að 43 prósent allra atvinnulausra. Það er sama hlutfall atvinnulausra og erlendir atvinnuleitendur voru í febrúar 2020.
Alls bjuggu 59.490 erlendir ríkisborgarar á Íslandi um mitt þetta ár. Þeir eru 15,6 prósent allra íbúa. Því liggur fyrir að atvinnuleysi er mun meira á meðal þeirra en íslenskra ríkisborgara.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
atvinnuleysi
Minni atvinnuþátttaka meðal múslima ekki rakin til viðhorfa þeirra sjálfra
Dregur úr atvinnuleysi á landinu öllu
„Þetta er bara mjög ómerkileg framganga“
Ráðningastyrkir kosta ríkissjóð 15 milljarða á árunum 2021 og 2022
Atvinnuleysi óvænt óbreytt milli mánaða en langtímaatvinnuleysi enn mikið
Athugasemdir