Afkoma samstæðu Isavia árið 2020 var neikvæð um 13,2 milljarða króna – um 14,4 milljörðum lakari en í árið 2019. Tekjurnar drógust saman um 62 prósent frá fyrra ári og námu um 14,7 milljörðum.
Þetta kemur fram í tilkynningu frá Isavia, en ársreikningur opinbera hlutafélagsins var samþykktur á aðalfundi í dag.
Tekjusamdráttinn má að sjálfsögðu rekja til þess að umferð um Keflavíkurflugvöll hefur hrunið vegna heimsfaraldursins, en farþegum sem fóru um Keflavíkurflugvöll fækkaði um 81 prósent frá árinu 2019.
Faraldurinn tók völdin
„Árið 2020 var afar krefjandi fyrir rekstur flugvalla og flugleiðsögu í öllum heiminum. Heimsfaraldurinn af völdum Covid-19 tók í raun völdin í öllum okkar daglegu athöfnum og fór Isavia síður en svo varhluta af því. Á síðasta ári fór mikil orka í að tryggja fjármögnun og aðgang okkar að lausu fé ásamt því að standa vörð um sterka innviði félagsins,“ er haft eftir Sveinbirni Indriðasyni, forstjóra Isavia, í fréttatilkynningu.
Hann segir að búið sé að snúa vörn í sókn. Vel hafi tekist að tryggja aðgang að lausu fé, en handbært fé Isavia nam um 9,4 milljörðum króna í árslok 2020. Sveinbjörn segir að þrátt fyrir að taka hafi þurft erfiðar ákvarðanir og fækka starfsfólki á síðasta ári hafi félagið engu að síður getað „staðið vörð um stærri hluta starfa.
Ríkið tók ákvörðun um það í janúar að spýta 15 milljörðum króna inn í rekstur Isavia. Sveinbjörn segir það hafa verið mikilvæga ákvörðun.[links]
„Fjármálaráðherra, fyrir hönd eiganda okkar, tók ákvörðun í byrjun þessa árs að auka hlutafé í félaginu sem gerði okkur kleift að fara með uppbyggingaáform Keflavíkurflugvallar af stað á ný. Sú ákvörðun var afar mikilvæg, bæði fyrir samkeppnishæfni flugvallarins til framtíðar og möguleika okkar að komast út úr Covid-19, miðað við mismunandi sviðsmyndir en ekki síst fyrir erfitt atvinnuástand í nærsveitarfélögum Keflavíkurflugvallar,“ er haft eftir Sveinbirni.
Áfram má búast við því að rask verði á ferðum til og frá Íslandi vegna faraldursins, enda bólusetning hér á landi skammt á veg komin. Sveinbjörn segir það engu að síður „lykilatriði að missa ekki sjónar á því markmiði að opna Ísland þegar tækifærið gefst“ og bætir við að bólusetningar á tveimur mikilvægustu mörkuðunum, Bretlandi og Bandaríkjunum, gangi vel og stjórnvöld á Íslandi hafi boðað „afar mikilvæg skref í átt að opnun landsins.“
[adspot]
„Auðvitað þurfum við að taka mið af stöðu faraldursins hverju sinni en við finnum fyrir miklum áhuga hjá flugfélögum sem við þjónum á þeim skrefum sem hafa verið rædd vegna umferðar til Íslands og munum að sjálfsögðu gera allt sem í okkar valdi stendur til að tryggja að endurheimtin verði sem farsælust,” segir Sveinbjörn.
Á aðalfundi Isavia í dag var kosin stjórn og varastjórn félagsins. Stjórnirnar eru óbreyttar. Í aðalstjórn sitja Orri Hauksson, stjórnarformaður, Eva Pandora Baldursdóttir, Matthías Páll Imsland, Nanna Margrét Gunnlaugsdóttir og Valdimar Halldórsson.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
ferðalög
Ólafur Arnalds
Lífsreynslusaga: Saxað á eignasafn Ergo fjármögnunarþjónustu
Bandaríkin opnast og ferðagleði grípur um sig
Hafa þurft að vísa vottorðalausum farþegum frá
Bandaríkin ætla að halda ferðabanni gagnvart Evrópu til streitu enn um sinn
Misjafnar kvaðir á erlendum landamærum fyrir ferðamenn frá Íslandi
Athugasemdir