Launakostnaður vegna upplýsingafulltrúa hjá borginni yfir 100 milljónir árlega

Alls eru upp­lýs­inga­full­trúar í níu stöðu­gildum hjá Reykja­vík­ur­borg en þar af er einn í 80 pró­sent starfs­hlut­falli. Þetta kemur fram í svari borg­ar­innar við fyr­ir­spurn Kjarnans.

Í svar­inu segir að sex hafi verið í upp­lýs­inga­deild/sam­skiptateymi sem starfi þvert á fagsviðin og séu tveir hjá umhverfis- og skipu­lags­sviði, þar af annar í 80 pró­sent starfi og einn nýlega ráð­inn í 100 pró­sent starf hjá vel­ferð­ar­sviði.

Árlegur launa­kostn­aður við þessi níu stöðu­gildi er um 102 millj­ónir, að því er fram kemur í svar­inu.

Auglýsa eftir teymisstjóra samskiptateymis

Á vef Reykja­vík­ur­borgar kemur fram að borgin leiti nú að ein­stak­lingi til að stýra sam­skiptateymi á þeirra vegum. „Sam­skiptateymi er stað­sett á skrif­stofu borg­ar­stjóra og borg­ar­rit­ara og fer með fag­lega for­ystu varð­andi fram­sækni og fram­þróun í upp­lýs­inga­gjöf, vöktun, miðlun og sam­skiptum borg­ar­innar við starfs­fólk, íbúa, fjöl­miðla og gesti borg­ar­innar og vinnur að því að Reykja­vík­ur­borg sé í far­ar­broddi á þessu sviði. Í sam­skiptateymi starfa sér­fræð­ingar á sviði upp­lýs­inga­mála,“ segir í aug­lýs­ing­unni.

Helstu verk­efni og ábyrgð sem felst í starf­inu er inn­leið­ing og eft­ir­fylgni sam­skipta- og upp­lýs­inga­stefnu borg­ar­innar, stjórnun og dag­leg ábyrgð á starf­semi og rekstri sam­skiptateymis, fag­leg upp­bygg­ing og þróun sam­skiptateymis. Jafn­framt á þessi aðili að leiða sam­ráðs­vett­vang upp­lýs­inga­full­trúa innan Reykja­vík­ur­borgar og leiða Reykja­vík­ur­borg inn í „áskor­anir í síbreyti­legu og fjöl­breyttu fjöl­miðlaum­hverfi“. Enn fremur mun þessi ein­stak­lingur sinna ráð­gjöf á sviði sam­skipta- og upp­lýs­inga­mála borg­ar­innar og hafa yfir­um­sjón með skipu­lagi og ráð­gjöf hvað varðar sam­skipti við fjöl­miðla og almenn­ing.