Stjórn VR samþykkti að fara í stríð við smálánafyrirtækin

Stjórn stétt­ar­fé­lags­ins VR sam­þykkti í kvöld, með öllum greiddum atkvæðum, að ger­ast fjár­hags­legur bak­hjarl neyt­enda í bar­átt­unni gegn smá­lán­um.

[links]Í því mun fel­ast að VR, í sam­starfi með Neyt­enda­sam­tök­un­um, mun leggja út fyrir kostn­aði vegna lög­fræði­vinnu og dóms­mála sem þarf að höfða til að koma í veg fyrir að smá­lána­fyr­ir­tæki og þeir sem sinna inn­heimtu fyrir þau geti haldið áfram að inn­heimta okur­vexti frá lán­tök­um.

Kjarninn greindi frá því fyrr í dag að Ragnar Þór Ing­ólfs­son, for­maður VR, myndi leggja fram til­lögu þess efnis fram á fund­inum. Hann sagði í sam­tali við Kjarnann að mark­miðið með til­lög­unni væri að algjört stöðvun verði á greiðslum á öðru en höf­uð­stól til smá­lána­fyr­ir­tækja eða inn­heimtu­fyr­ir­tækja sem starfi fyrir þau.

[adspot]Fyrstu skrefin verði að hvetja fólk til að hætta að greiða af lánum sem séu ólög­leg. Þá verði fyr­ir­tæk­inu Almennri inn­heimtu ehf., sem hefur séð um að rukka inn smá­lána­skuld­ir, og for­svars­mönnum þess stefnt. „Þetta verður ekki í fyrsta sinn sem við erum að fara í skít­verkin eftir að lög­gjaf­inn bregst. Fólkið sem er að lenda í klónum á þessum fyr­ir­tækjum fær að finna að það hefur ein­hvern bak­hjarl. Það mun breyta mjög miklu gagn­vart þeim.“

Stuðn­ingur VR mun ná til allra smá­lána­taka sem þurfi á honum að halda, ekki ein­ungis félags­manna VR. Verið er að meta kostn­að­inn við aðgerð­ina en fyrir liggja ákveðna hug­myndir um kostnað við fyrstu skref og við að halda úti lög­manni til að taka við fyr­ir­spurnum frá þeim sem hyggj­ast nýta sér aðgerð­ina.