Aðstandandi sjúklings sem var ginntur til að kaupa „kraftaverkalausnina“ MMS, Miracle Mineral Supplement, segir það alrangt að varan hafi ekki verið seld. Aðstandandi sjúklingsins biðst undan þess að vera nafngreindur, ættingja síns vegna. Jóhannes Bjarmarsson, framleiðandi MMS og eini eigandi Gæðafóðurs, hefur ítrekað haldið því fram í viðtölum við Stundina að varan, sem byggir í raun á iðnaðarklór, sé ekki seld á neinu föstu verði.

„Við höfum ekki verið að selja þetta á neinu föstu verði. Við höfum bara látið fólk fá þetta og látið það borga það sem það vildi. Við erum bara að hjálpa fólki en ekki að græða neitt,“ sagði Jóhannes þá. Á heimasíðu Jóhannesar var áður hægt að finna verðlista á mismunandi útgáfum vörunnar. Nú er þó búið að fjarlægja þann hluta vefsíðunnar. Þar stóð áður að 150 millílítrar af ACD drykk, en ACD er annað orð yfir MMS, kostuðu 34 evrur, eða tæplega fimm þúsund krónur. Aðstandandi sjúklingsins segir að ættingi sinn hafi borgað ríflega þrjú þúsund krónur fyrir sambærilega vöru.