Júlíus Júlíusson, sölumaður óhefðbundinna lækningameðferða, sem birt var myndband af í Kastljósi RÚV í gærkvöldi, kvartar undan umfjölluninni og segist hafa reynt að hjálpa Guðjóni Sigurðssyni, formanni MND-félagsins, þegar hann reyndi að selja honum óhefðbundnar meðferðir við hinum ólæknanlega MND-sjúkdómi. 

Júlíus kvartar sérstaklega undan spurningum Guðjóns á myndbandsupptökunum og svo þeirri staðreynd að Guðjón tók upp samtalið. „Ég gaf þessum manni fría heilun í um samtals 5 klukkustundir og mætti til hans í alls um 9 skipti til að reyna að hjálpa honum til betri líðan,“ segir Júlíus á Facebook síðu sinni.

Bauð meðferð á hálfa milljón

Á upptöku Kastljóssins heyrist Júlíus lýsa fyrir Guðjóni meðferð sem bandaríski eðlisfræðingurinn Dan Nelson framleiðir. Í henni felst að leggja filmur ofan á diska, sem sagðir eru hafa heilandi áhrif og lækna jafnvel krabbamein. 

„Hver diskur kostar sirka 300 til 350 dollara, þannig að það er upp undir þúsund dollara bara diskarnir þrír.“

„Hver diskur kostar sirka 300 til 350 dollara, þannig að það er upp undir þúsund dollara bara diskarnir þrír. Síðan eru þrjátíu filmur og hver filma kostar 100 dollara. Þetta er sirka fjögur þúsund dollarar [um 500.000 kr.]. En ef maður kaupir allan pakkan í einu þá fær maður einhvern „discount“, sem er kannski þrjú og fimm eða eitthvað svoleiðis,“ útskýrir Júlíus. Hann tekur einnig greiðslu fyrir að beita meðferðinni. „Ég hef verið að taka fjögur þúsund kall á tímann í þessu. Venjuleg meðferð, bara prótókolinn sjálfur, hann er tveir og hálfur tími. Þegar það er ástand sem er alvarlegt, eins og til dæmis hjá þér, þá tekur það lengri tíma. Þá þarf að fá fleiri samsetningar en venjulegi prótókollinn. Þá tekur þetta alltaf meira en þrjá tíma, sko.“

Júlíus með pendúlinn Á myndbandinu sést Júlíus greinilega sveifla pendúlnum, en vísar í hann sem svar við spurningu og sem nema fyrir heilandi orku.

Mynd: RÚV

Pendúllinn gaf „svakalegt já“

Júlíus kynnti fyrir Guðjóni sönnun fyrir orkuvirkni filmanna og diskanna. Sönnunin var hreyfing pendúls sem hékk í taumi úr hönd hans. Pendúllinn hreyfðist ekki fyrr en hann kom yfir filmurnar. 

„Ef ég set hann svo hérna, þá byrjar hann að snúast,“ segir Júlíus á myndbandinu, og hreyfir höndina þannig að pendúllinn sveiflast. „Sérðu hvað hann er öflugur? Þetta er alveg rosaleg orka sem kemur hérna út. Svona mun þetta vera það sem eftir er lífsins, sko. Þetta er orka sem filman sendir út. Svo setjum við filmu með þessu og breytum tíðni og setjum þetta á líkamann.“

„Hafa þeir prófað þetta á MND?“ spyr Guðjón.

„Á síðasta símafundi lagði ég fram fyrirspurn fyrir MND. Og þá gaf hann mér upp það, hvaða samsetning hentar best. Og ég þarf að koma sjö daga í röð. Það sem hann sagði er ákveðin samsetning. Eitt svona ballanseringarprógram eru svona þrjátíu samsetningar, þar sem er diskur settur á ákveðinn stað með ákveðnum filmum. Fólk í alls konar ástandi hefur fengið ótrúlegan bata.“

Í kjölfarið sagðist Júlíus ætla að „spyrja pendúlinn“ hvort hann þyrfti alla meðferðina. Á myndbandinu sést hann sveifla pendúl og heyrist segja: „Og þá kemur alveg svakalegt já, sko.“

Venjulegt vatn kemst ekki í frumur

Júlíus reyndi að selja Guðjóni jónað vatn sem myndi hreinsa líkama hans, þar sem venjulegt vatn kæmist ekki inn í frumur líkamans nema að litlu leyti, því sameindir vatnsins væru samanklesstar.

„Þegar við drekkum venjulegt vatn, þá er bara fimm prósent sem fer í frumurnar.“

„Það er vatn sem er búið að breyta mólekúlunum í þúsund sinnum minni mólekúl. Þegar við drekkum venjulegt vatn, þá er bara fimm prósent sem fer í frumurnar. Því það er svo „clusterað“ vatn. Það er búið að líma svo mörg mólekúl saman að það kemst ekki inn í frumurnar. En þetta fer allt inn í frumurnar. Og það detoxar líkamann af öllum eiturefnum. Fólk sem er að drekka þetta vatn getur helmingað lyfjaskammtinn.“

Júlíus hefur selt vatnið í apótek og heilsuvöruverslanir. Hann selur vatnið á þrjú þúsund krónur.

Guðjón Sigurðsson Formaður MND-félagsins segir örvinglun við ólæknandi veikindi valda því að fólk sé ginnkeyptara fyrir óvísindalegum sögum af bata.

Mynd: RÚV

Aðferðin er að vísa í einstakar sögur af bata

Guðjón lýsir því í Kastljósinu hvernig sölumenn óhefðbundinna lækningameðferða nýta sér örvæntingu veikra.

„Þessi örvinglan serm sækir á þig þegar þú greinist með ólæknandi sjúkdóm, þá birtist svona fólk og vekur með þér falsvonir. Það býður þér einhverja meðferð, einhver efni, einhver tæki, sem að eiga ekki að lækna þig - eða þeir lofa engri lækningu, en áður en þeir segja það þá eru þessir karlar búnnir að segja dæmi um hundrað aðra sem læknuðust af hinu og þessu. En svo kemur í smáa letrinu: Við lofum engri lækningu. Sem er náttúrulega bara til að fría sig málsókn út af svindli og svínaríi.“

Guðjón spyr Júlíus á upptökunni: „En eru dæmi um MND-veika úti sem hafa fengið lækningu?“

Júlíus vísar í samtal sitt við eðlisfræðinginn Dan Nelson, sem þróaði meðferðina. „Nú spurði ég hann, þetta er eðlisfræðingur sem uppgötvaði þetta ... Til dæmis lagaðist blöðruhálskirtilskrabbamein af þessu á einni meðferð.“

Önnur vara frá Júlíusi Júlíus Júlíusson reynir einnig að selja búnað sem hann segir að brjóti niður sameindir vatns með orku. „Vatnið er mýkra og mólekúlin eru mun minn og vökvar líkamann betur. Gefur meiri orku og vellíðan. Gott fyrir hár og húð, minni sjampó notkun.“

Mynd: Facebook

„Mig hefur alltaf langað að hjálpa fólki í vanda“

Júlíus reyndi að fá lögbann á birtingu þáttarins í gær. Niðurstaða Júlíusar eftir umfjöllun Kastljóss er að verið sé að reyna að láta hann líta illa út. „Kæru Face-bókar vinir nú finnst mér þurfa að segja nokkur orð vegna Kastljóss-þáttar sem var í kvöld. Ég er sá maður sem hefur alla mína tíð viljað fólki vel og gert allt í mínu valdi til að hjálpa fólki. Nú lét þessi maður Guðjón Sigurðsson setja upp falda myndavél og fór í einhvern leik með Kastljóssmönnum og koma með villandi spurningar og reyna að láta mig líta út fyrir að vera að reyna að hagnast á dauðvona fólki. Það merkilega við þennann málatilbúning er að þetta er eins langt frá sannleikanum um mig eins og mest getur verið,“ segir hann og vísar í persónueinkenni sín því til staðfestingar að hann hafi ekki reynt að hagnast á veikindum Guðjóns.

„Nú hef ég hjálpað fólki í all mörg ár og aðeins haft það að leiðarljósi að gera vel fyrir viðkomandi. Það hefur verið mitt áhugamál, svo skrýtið sem það hljómar að mig hefur alltaf langað til að hjálpa fólki í vanda. Það er svo gefandi fyrir sálina, finnst mér. Ég vona að ég sé ekki einn um að upplifa mig sem slíkan mann.“